Reunion Island nung tayimtsü shilem maneni nguogo: Malaysia

Kuala Lumpur, August 06 (Agencies): Taoba hopta Malaysia jetliner tayimtsü indang tashikdang shilem ka shia arudak, Reunion Island, Indian Ocean nung tayimtsü indang shilem kar maneni anguba osang ka Malaysia transport minister, Liow Tiong Lai-i tanü Brehostibar nü metetdaktsüogo.

“Tan angua tayimtsü shilemtemji tayimtsü menden, kirüki nung inokba aina aser iba amala oset kar lir,” ta pai metetdaktsü.

Ano külen, taoba hopta Reunion Island nungisa bena aruba ‘flaperon’ ta ajaba tayimtsü tashikang shilemji ita 17 tejaklen samaba Malaysia Airlines Flight MH370 Boeing 777 tayimtsü nungi sükzüka aluba tayimtsü shilem ta kuli bushitetba osang ka Malaysia Ato Kilonser, Najib Razak-i tanü metetdaktsü.

“Reunion Island nung anguba tayimtsü tashikangji samar bushitepba MH370 tayimtsü nungi sükzüka aluba tayimtsü shilem ta iba amala osettsüset bushisüngdangba international telok kati kuli ngutetogo ta ni tanü temulung shiranga sangdonger,” ta Razak-i MH370 samar anogo 515 abensanü, tanü television ajanga metetdaktsü.

MH370 tayimtsüi anir aliba China nunger kinüngertemia Beijing nung tentetba Malaysia Airlines office kimalen tanü sentepa longkak aitba osang jangjaogo.

“Tayimtsü shilem kar angubaji kuli tejangja masü. Onoki olulu masü saka ochi metetner anungji, onok dang ochiji metetdakjang,” ta jala aser tanük na MH370 den külemi samaba tebo, Zhang Meiling-i metetdaktsü.

Tanü tayimtsü shilem maneni anguba osang angazükba sülen Malaysia Airlines-ia lendong ataloka takoksa tulu ajuruba atema sasa bilemba olen ka lendong ajurur kinüngertem den lemsatepa liasü.