Rev. Billy Graham arishi küm 99 nung asü

Carolina, Tsüklai 21 (TYO): Alima nung nisung ajaki metetba evangelist aser putu 20 buba nung sayutsüngir tajungtem rongnung ka Rev. Billy Graham arishi küm 99 nung lia alima nungi pilaogo.
Rasemnü anepdang 8:00 ako meta Montreat, North Carolina nung par kidang pa asü, ta Billy Graham Evangelistic Association otongdar kati metetdaktsü.
Küm 60 tashi sayutsüngia senzüba sülen 2005 küm Rev. Billy Graham-i mapa nungi anisüngzüka liasü. 2005 küm pa indang tatembangba New York City crusade ji denomination 82 nungi regional church 1,400-i teyari agüja ayongzük.
Billy Graham-i U.S tir 10 dak tema atema counselor mesüra minister ama inyaka aru aser pai linük 185 nung nisung million 215 jungnüa dang sayutsüngia liasü. Ibaji dang masü saka radio, television aser internet ajanga ajanga pai nisung million aika den Tsüngrem osang lemsatepogo.
Billy Graham-isa kaket aika züluogo aser item rongnung 1997 küm “Just as I Am” kaket dena lir. Iba kaket ya New York Times bestseller liasü.
Rev. Billy Graham indang tenüng shitakbaji William Franklin Graham liasü aser pa dang “America’s pastor” ta ajar. Pa arishi küm 16 asüdang pa taküm nung Yisu agizük aser 1943 küm Ruth McCue Bell den kibong aküm. Tena nem tanur pungu moaja lir.
US tir Donald Trump-ia tanep Twitter nung Billy Graham dang “GREAT Billy Graham” ta jaloktsü aser “Pa ama shinga maliasü! Khristantem aser tamangba yimsü ajaki pa kanga menungratsü. Pa ya nisung khenyongi balaka liasü” ta zülu.