Rev Chujang taküm otsü tatsüka

~  Sashimeren Jamir.

“Shibai kü dak amangdir, pa süaka taküm alitsü”
Aikati meteta alitsüa akok saka ano karibo memeteti alinunga ta ser Chungtia nunger Tsüngrem tenzüker Rev. P. Chujang indang taküm otsü tatsü ka asenok den lemsateper. Pa 13th March, 1919 nü aso aser 31st March 2016 nüto iba akümli wadang temer ogo. Tsürabur Rev. Chujang, pa Purmayang aser Jepangmenla tena jabaso lir. Pa lanuwa tebu süadoker tetsü kisüngi dang timtem tulu agia mesütetba pa otsü ajanga angazüker.
Pa 15th April, 1944 anogo nung adianutsür Mokoksangla den temeshi kiyimba kulizüng agia kibong aküm. Tsungremi tena nem jabaso 4 aser jala 5 moatsü. Parnok nungi jakzükba mezüng semchir 81 aser tanabuba semchir 36, ajak agi semchir 117 lir.
Pai Tsüngrem wadang inyaka yutsüba tanü tejang tajung ajaki metetba Rev. C. Temjen, Pastor mapa küm 29 tashi inyaker tang sodi agia Chungtiayimsen nung lir. Jala C. Alila kinünger rongnung tanutsütila tang lai Mokokchung Ungma lushi nung “Miracle Home Prayer and Counseling Centre” ka lapoka alima tesem balala nungi arua shi aser tanela taneptsüba wadang tulu inyakdagi.
Pa Impur nung Class VI zünger Chungtia arogo nung Pastor 1944 küm nungi inyak. Iba sülen Chungtia Arogo teyari agia Jorhat Bible School nung azüng. 1948-1949 küm ana zünga graduate asü.
Pai Pastor mapa nung küm 55 tashi inyakba kuli yamai agütsür:
1.     Chungtia Arogo nung 1944-1989 January ita tashi inyak.
2.     Lakhuni Arogo nung 1974 küm ita ana ABAM–i asüngdangba ama yaritepa liasü.
3.     Kinunger Arogo nung 1990-1997 May ita tashi inyak.
4.     Sapangya Compound Arogo nung 1999-2001 May ita tashi inyak.
Chungtia Arogo ajanga 1974 kum July 21st nü pa ordain sütsü. Pa sannükba wadang nung alidang Baptitsüba ajak agi 2678 liasü. Temeshi kiyimba kulizüng agütsüba ajak agi 260 liasü.
Rev. P. Chujangi 1974 küm nungi, pa asüba hapta 2016 tashi tenla kidang anepdang aser anüngdang khen ta ken tena sayatsüngiba ajanga Chungtia Arogopur temoatsü agiba aser temeket Arogotema temoatsü anguba osanga angazüker.
Rev.P.Chujang tenzükba wadang nung alidang aser pa asüba anogo tashi nung pa taküm aser kibongi Tsüngremer wadang tajungtiba nung tenzüka aruba ajiteta, pa nem lokti balalai naroküm agütsüba tenüng kar yangi agütsür.
1.     Chungtia Arogoi            ­——– “Tamangdir Tebu”
2.     Chungtia Putu mendeni        ­——– “ Taremzük Lung”
3.     Chungtia Laishir Telungjemi    ­——– “Tamang Nokinketer”
4.     OATT-i                ­——– “Shiti Tsüngnep”
5.     Ordain Ministertem-i         ­——– “ Meremsepba Atunutsuk”
6.     IEF Teloki                 ­——– “The man of music”.
Rev. Chujang tasüba anogo tashi pa Chungtia yimtak tambuti, Ao lima aser Naga lima ajak nung ordain Minister ajak rongnung tambuti liasü. Naga lima ajunga nung Pastor mapa talangtiba inyaksangjia pa liasü.
Pa ama tamangdir tebu ka samabaji sasa bilemer. Pa asüba anogo mapang tashi nung pa dak shirangba mesüra tashidak agi kangshiba kecha balakabo maliasü. Tanur, adianu aser semchir den tatembang o ajak jembir dang Tsüngremi pa tenzüker tajung ka ama kecha timtem melii iba lima nungi bener ogo.
Alima shi tsütsü bilemdangbo pa asübaji tesasatsüka, aji saka, pai inyakba mapatem bilemtetang akümlirtem ibajagi anisüngzükdaktsür. Yohan 11:25, “Shibai kü dak amangdir, pa süaka taküm alitsü”, ta ashiba ama, tsürabur Rev. Chujang iba akümli toktsür oaka, pa taküm alidang tsüngnep yutsüba tamaren mapatem akümliri kodanga mamadoktettsü. Tsüngremi tsürabur nela anisüngzük nung yujangma.