Rev. Dr. Edward Winter Clark Aortem asoshi taküm tenla

~   Dr. Asangba Tzudir.

December 22, 1872 ya Naga tenem nung Supongmeren, Godhula aser Dr. Clark nunger mapa ajanga mezüng Khristar Arogo Molungkimong nung amenok aser iba yim nungi tenzüker Molungyimsen (1876) aser Impur (1894) nung Mission Centre amenoka Aor aser tanga Naga kimtem dangi Yisü yimsü indang ayimsünga prokshia ao. Kum 146 tejakdang Dr. Clark-i Naga nunger atema yamai sarasadem, “Kibuba kü taküm nükang, aser item tenem kintemi ola adoka Nü tenüng masang tashi kü nem küm aika parnok den lia nü osang tajung proktsü asoshi tashi agüjangma.” Tsüngremi pa sarasadem langzü medem mezüng Tsüngrem osang Naga tenemi bener arurtem Godhula Babu (October 1871) aser Dr. Clark (December 1872) nungeri kechi mapa tajung inyaka doktsü iba ajanga tanü asen Naga nungertem talisa Aortem Arogo aser kaket-keno (literature) shisaliok nung iba jenjang tashi tongtetogo.
Iba ocet yagi Dr. Clark-i Naga nunger aser talisa Aortem asoshi kechisa Naga tenem nung alidang inyak aji mayimjemtettsü, anungji pa America nungi arua Sibsagar nung alidang koda Naga Mission asoshi nüngsen jenti agia bendanga agütsü iba indang akok ka lemsateper.
Dr. Clark, talisa pa Sibsagar nung alidang yongi pa tenük Naga tenem nung rangloker liasü aser timtem tuoshi nüngsen aika kokteta pai Naga Mission lapok. Aser Yamaji pai Aor sobalibaren den apet Khristan yimsü prok. Anungji tanu Naga nunger Christianity yabo ‘indigenous Christianity’ ta shitet. Ano pa Foreign Mission asoshi meshimdang par America lima Logansport, Indiana nung Baptist Arogo ka nung Pastor liasü. Aser pa Indiana Baptist Paper “The Witness”, aser iba sulen “The Standard” indang Editor aser Publisher liasü. Aroka shisadangra, pa ama ka asen limai maru asübo Naga nunger rongnung Khristan yimsü aser kaket-keno (literature) ya kechi jenjang ka nung lila na? Oda Dr. Clark ya Naga Mission atema jelia renemer ataa liasüba amai.
Dr. Clark aser pa tebutsü Mary Mead, India lima dangi missionary ka ama shimba sülem, Boston nungi October 20, 1868 nu apusor tzüyim nung “Bark Pearl” rong nung anogo 160 jajar Calcutta atong aser idak nungjagi Sibsagar bushia train, rong aser shiti nung melentepa mener March 30, 1869 nü atong. Pa Mission Press nung Superintendent ka ama aser Assam Mission mapatem inyaktsü agizük. Oda, iba mapang nung Dr. Clark-i Mission Press mapaji magizük asübo Pressji mapa anenadoker lila. Kechiyong, press “operational costs” tali adokba agi Mission Boardi aiben Pressji shibangtsü bilemdanga liasü. Iba mapang Assam ajonga nung Mission Press ka ji dang liasu. Saka Dr. Clark tamalen Editor aser Publisher mapa inyaker aliba ajanga pai press mapaji takok ngua inyakba pa mapang adokba kakettem ajanga kuli agütsür.
William Ward-i Mission Press mapaji Dr. Clark nüm July 10, 1869 nü nungloktsü aser iba mapang Press business valueji Rs. 100 liasü saka sentsüh (debt) bo Rs. 200 liasü ta ashir. Clark-i Pressji jungjunga inyaktsü atema küm nung sen Rs. 1000 bo nungdaktsü ta ajiteta inyakyim melenshi aser 1869-1870 kum noklem accounts nung sen Rs 500 tetemlok aru. 1870 tatemlen bo kaket ayokba nungi Rs. 550 aru. Kakettemji mission books, dictionaries, grammars, histories, school books, hymn books, aser penal codes liasü. Kum ishika tsüngda kaket aika adok aser October 1, 1873 nungbo kaket 49 adoker liasü. Item rongnung tongtipang kar – New Testament; 1st and 2nd Samuel; Genesis and Part of Exodus; Assamese and English Dictionary; Church and Sunday School Hymn Book; Pilgrim Progress; 1st and 2nd School Primer; 1st and 2nd Arithmetic; 1st and 2nd Catechism; Life of Christ Tracts. Item kaket züluadoker aliba ajanga, aser talisa Chungli Oshi aser Aor Sobaliba Molungkimong nunger Supongmeren ajanga Sibsagar nung alidang 1870s nungi sayua tenzüker alinungji Ao Kaket-keno (Ao Literature) dak sendakba tongtipangsa züluba aser oshi meyipzükba mapatem asoshi temelaba aküm. Yamaji, Molungyimsen nung 1883 nung press amenoker alidang Clark-i inyakba pai shity nung yamai zulua lir. “Ao nung Naga Catechism revise sur print asü; hymn book; Yosef taküm otsü Ao Oshi nung meyip aser print asü; Osang tajung Mathi aser Yohan Greek nungi Ao oshi nung meyipzüker print asü.” Aser maneni Aor kaket-keno mapa tali tajungba inyaktsü asoshi 1886 küm Nowgong nung December 18-29 tashi Assam Jubilee Conference amongdang Molungyimsen nung aliba Pressji Guwahati-i bener alutsü lemtet aser press mapa idakji tenzüka aotsü asoshi sen lemteta mungdang nung atenertemi molungtepa agizük.
Dr. Clark-i Naga Mission aser Evangelism takok ngua aotsü atema kaket-kenoji kanga tongtipang ta meteta liasü. Anungji Dr. Clark Sibsagar tonger Naga nunger meteta akümba sülenbo pai teti pa molungjang nung Naga nungertem tenem nung alirtem Yisü Khrista osang tongtettsüdak tesem nung metongteti aliba ajanga pa temolung kanga tipmetemi liasu. Yamaji pai Godhula dang par tesayur Supongmeren nungi Ao oshi aser sobaliba angazüktsü atema nungloktsü. Yamaji, Supongmeren-i Godhula dang 1870s nungi Ao oshi sayua tenzük aser 1871 nungbo Supongmeren aser Molungkimong nunger tamburtem teyari ajanga Ao Oshi nung ken aser Kibubai Sayuba sarasadem Ao oshi nung meyipzüka zülur liasü. Ibaya Ao kaket-keno (Ao Literature) tamendakdak tongtipang ka lir. Godhula mezüng Molungkimongi Supongmeren-i anir October 1871 nung atudang pai Assamese aser Ao oshi nung sayutsüngia ken atenba ajanga nüpurtem temolungjang nung kongshia, pa meyipa alutsü ta asüdang tetsürtem ajebba indang zülua angutsü, aser Kosasanger Putu-ia pa nem tapet tetushi agüja Sibsagar tashi nisung 40 Godhular ki tonga meinoktsü.
Talisa, mezüng Molungkimong nungeri Sibsagar Mission Press aser School kidang tanurtem dang sayuba süngmanga reprangba ngua Clark-i Naga tenem Mission atema lenmang ka angu aser Yamaji Molungkimong nunger telok nung “tanishisangia” Clark dang yimdaki atur parnok chirtem danga “kaket den jembitsü” sayuang ta ashiba zulua lir. Anungji Clark-i Board dangi Naga nunger Mission ji ajungtsü ta meteta temolung agütsütsü indang zülu aser yamai shisem, “tenem nung alir Naga nunger Missionji tesem ka nungibo tenzüktsüla, parnok atema missionary nungdak. Dikhu ayong tzu ayimba ajanga Naga nunger khrista indang memeteti asüba indang temolungi arur aser aonung mopung nung ‘oa kintem nütsüng kumdakjang’ ta Kibuba olai ashiba kü narongi tenoka aiter, anungji ni parnok dangi aotsü.
Dr. Clark-i press aser mission mapa tulu tetemlok keta inyakpoka oaka pa anema pa inyakyim nung temolung mesui ano pa dak nungi tali ang yimla. Dr. Clark-i Corresponding Secretary Murdock dangi yamai zulu, “ya kü azü tatempangba tashi tenlatsü yimlar, mesüra parnoki kü mapa kechi aser kodasa inyaker-ar tera dang metet.” 1874 kum pa dang kecha meshi-e dang boardi ajongbena Mission Pressji ayoktsü lemtet. Clark-i press shibangtsüba indangji kanga sasaa boardi Mission Press inyakyim junga aoba mapang ayoksü lemtetbaji pai tasüngdangba agütsü, aser yamala lemtetjibo missionarytem dang tama asüngdangerang agiba tajungba ta pai shisem. Talisa, Naga mission tenzüka doker asünung Printing Press ka alibaji Naga Mission atema kanga tajangzük kechiyong Naga missionji junga inyaka aotsüba atemaji Naga nungertem dang azüngtsü sayutsü aser ibaji ajanga yimsü aser shisaliok tajungba sayutettsü. Tatem nungbo Dr. Clark tangatetba shisa agi iba press ajanga maneni Naga nunger kaket-keno aika menünga tatemsa pai Aor tongti kaket Ao Naga Dictionary 1911 kum adoktsü. Supongmeren-i Ao oshi aser Aor sobaliba Sibsagar nungi sayua tenzükba nung tera yanger (roots) iba Ao Naga Dictionary Clark tebutsü Mary Mead, Edijungba, Subonglemba aser Kilep nunger teyari agia renem. Yamaji Sibsagar nung Arogojia pa 1869-1876 kum tetenzüklen tashi aliba mapang nisung 73 baptija tamangertem aika rendaktsü.
American Baptist Missionary Union nungi sen peria meyoker aser Sibsagar nung tamangertem dak sen aika endokba meteta, Naga Mission atemabo pa tangatetbaji yamai ang liasü. Kangasa nüngdak ka mesüra Naga nunger asoshi sayutsüngirtem atema sen teyari magütsütsü saka Naga nunger sayutsüngir aser Naga nunger tesayurtem rendaktsütsü atema Missionarytemi parnok dang tamasa sayubentsü agütsüdaktsütsü aser ibaji ajanga parnokia meyiper sayutsüngia aser tesayur mapa inyaka parnoka sobaliba-a alitsüba lenmang parnok sasa lapoktsü. Tanü Naga Christianityji libaliro-sobaliba (Indigenous to Nagas) den apetbaji Clark-i yamala tangatetba nung ajemdaker Naga nungertemji Khristan kümdaktsü, aser pa theological doctrine-ji kanga dang sadema liasü ta angateter. Pai yi (Rice beer) ajemba menokdang kechiyong Naga nunger atema yi-ji dang “nutritious drink” liasu aser ano Molungkimong nung pa alidang Chapel-i kozü sali mejaka arurtem sali metsü metsütsü atema aou taki sa agütsü ta otsü jembir.
William Ward August 1, 1873 nü asüba sülen pa tebutsü Mrs. Susan Ward den Sibsagar Mission budget atema sen tsütsülen aser inyakyim tatsütep nungi Clark dena mangatettep adok. Kodang Mission budget Board nungi Clark dangi masü saka Mrs. Ward dangi yok, iba ajanga Clark aser Godhula na tsüngda tesentaktep raksatsü. Anungji, Clark-i Molungkimong nung Naga Mission atema board dang budget balaka tenzüktsü asoshi kanga mepeshi. Aser ano Clark-i Sibsagar Arogoji repranger asünung pa ajanga sayutsüngirtem itasenji acha-ayangtsüla ta nokdak aser yamala tatsütep inyakyim ajanga mangatettep tali adoka Mrs. Ward-i Sibsagar Mission Chapel nung masü saka par Bungalow nung dang Deobar tekülem tenzük. Aser lai January 25, 1874 nungibo Chapel-i maru aser sayutsüngirtem la den mekülemi Chapel nung külemertembo itasen nungi sen lokzüktsü amokmeren. Kodang Kolibar-i Deobar nü Chapel nungi külemtsü lemtet, Mrs. Ward-i pa itasen nungi sen 2 loktet. Dr. Clark joko Molungkimongi mezüng 1872 nung baptitsüi atuba sülen pai mapang-mapang semdang aser pa joko alitsü March 2, 1876 nung atudang pa iba mangatettep tia nung atu.
Saka pa asoshi aser Aor asoshi tepelatsü kaji, Godhula den ano missionary ka Molungkimong nung alitsü nüngdak ta meteta Molungkimong nung tamanger kar den yimdak tongtipur ka dena 1875 küm Clark dangi Sibsagar tashi lua nüktzü yima yimdak missionary ka atua alitsula ta ashiba Clark shity nung zülua lir. Iba temepeshiba atalokbaji 1876 küm January ita tatemlen British sorkari pa Molungkimong nung alitsüba temelaba agütsüba sülen pa yimdaki February 10 nü talitsüba renemi atudang yimdaklirtemi, talisa tamangertemi pa atua alitsüba indang angashia kanga pelaba indang Clark-i pa shity nung zülua lir. Yamaji, pa March 2, 1876 nung Molungkimong nung atua ali.
Dr. Clark Sibsagar nung alidang tensa balala ajuru aser ano külem Mission mapa nung inyaker den mangatettep liaka, aser talisa pa mapa nung nüngsen ang agüja, temulung masü sayuba den pa mapa junga menongit yonga pai Sibsagar nungi kechisa inyak iba ajanga Naga Mission renteta ao.
Temonungratsüka, Rev. Dr. E.W. Clark India limai pa arishi küm 38 asüdang missionary mapa inyaktsü arur pa taküm arishi kum tum kabo Arogo wadang aser kaket-keno mapa nung tenzüker pa joko arishi küm 81 asüdang May ita 1911 küm Naga nunger toktsür par limai meyipa ao aser March 18, 1913 anogo St. Augustine, Florida nung pa taküm tembang. Pa India limai aruba ya Naga nunger, talisa Aortem asoshi aruba amai. Pai Aor aser Naga nunger asoshi kechisarena tajungsa inyaka doktsüba süngjang maneni tangdagi. Anungji asenoki teti pai inyaka doktsüba mapatem tenüng sanga shisadangti. Pa leper lung nung yamai dang tongmelang agi zülua lir.

EDWARD W. CLARK D.D
SON OF PERRY CLARK
42 YRS. MISSIONARY IN INDIA
1830-1913
(Iba ocet ya osang kaket [Newspaper] atema züluba asünung yamaji züluogo. Anungji iba ocet ya kaket züluba nung reference küma mamshidaktsüner. Reference tejangja nüngdakra mesüra tongteprateptsü kar lira iba email ajanga züludaktsünür. asangtz@gmail.com)