Rev. Dr. Zelhou Keyho-i Monalisa Changkija-i züluba kaket ‘Middles’ sayatsüogo

Kohima, Luchii/Dec. 03 (TYO): Hornbill Festival dak sendakba nung tanü NDBA Hall, Naga Heritage Village, Kisama nung Naga tsür nüngtugu sangro zülur, kaketzülur aser journalist, Monalisa Chankija-i züluba kaket ka tenüng agi ‘Middles’ NBCC General Secretary, Rev. Dr. Zelhou Keyho-i sayatsüogo, ta ketdangsertem osang ka ajanga metetdaktsü.
“Middles” kaket ya imdangjem masü saka otsü kaket ka lir. Iba sentong nung jembidang lai, “Kaket keno ajanga shisadangdaktsütsüla aser meimchirtem melenshidaktsütsüla,” ta ashi.
Laisa, “Kaket zülurtem aser sangro zülurtemi tan putu indang dang masü saka tarutsü indanga telangzüba agutsütettsüla,” ta ashi.
Sentong lenir, Dr. Avinuo Kire-i kaketzülur indang tongmelang agi metetdaktsüdang, “Northeast nung yimobilem zülur aser proprietor tetsür kijaji Monalisa lir aser anogoshi adokba English osangkaket ‘Nagaland Page’ publisher lir,” ta metetdaktsü.
2009 küm la nem Chameli Devi Jain Award agüja liasü. 2009 küm December 14 nü Poetry Society of India küm 25 ajungba nüngtem nung la nem iba sempet agutsü. Kaket keno züluba nung lai inyaktetba mapatem atema la tushia 2013 küm Naga Students Union, Delhi-ia la nem NSUD Inspiration Award 2013 agüja liasü. Maneni 2014 küm January 26 nü la nem Nagaland Governor’s Award agüja liasü.
Ano 2014 küm April 26 nü FICCI Ladies Organization, Norttheast Chapter-i la nem 30th FICCI Woman Achiever of the Year 2013-2014 agüja liasü.
Tanübo lai züluba sangrotem Nagaland University nung under graduate & post graduate English courses nung agir. NBSE-ia la indang sangrotem Class 9 pur Alternative English course nung züngokogo. North East Hills University-ia M. Phil course atema lai züluba sangro kar shimogo.
Iba sentong nung Monalisa-i Heritage Publications yimobilem zülur, Dr. Asangla Tsudir aser Rev. Dr. Zelhou Keyho na dang pelaba lemsatepa liasü.