Rev. Lano Longchar den jentipuri akhüm tetushi agüja pilaogo

Mokokchung town nung Tsüngrem tenzükertemi Rev. Lano Longchar mang ayuba süngden tenla kidang ayuba noksa nung angur. June 21, 2016. & ABAM Executive Secretary, Rev. Dr. Mar Atsongchanger-i jembiba mapang agiba noksa angur.

Mokokchung, June 21 (TYO): Mungulbarnü tamangtir asür Rev. Lano Longchar den asü pila sentep sentong balala agia ana aser talang nungi jentipur adenshia mangyimtsüba den pa nem akhüm tetushi peria agüja par tasoyim Longkhüm yimtak renemogo.
Tanep mezüngbuba asü pila sentep sentong ka yangi Imkongmeren Sports Complex Indoor Stadium nung agia liasü. Iba sülen ano Mokokchung Town Baptist Arogo (MTBA) tenla kidang sentep balaka agi. Ajiser, pa mang par tasoyim Longkhüm bushia yangji remtsüogo.
Asü pila sentong balala nung Rev. Lano’er kinünger, medemer, anükapang, kin, arogo aser telok balala nungi lenirtemi temeim o den tenüngsang o, tayongzükba aser tepela o balala lemsatepa liasü. Mokokchung town nung tanü agiba Rev. Lano Longchar asüpila sentong yaa tulutiba rongnung ka asütsüsa nüburtem aika sentep.
Longkhüm nunger Rev. Lano Longchar ya 1935 küm aso. Pa tebu Longdangluen aser tetsü Medangnaro, tena dak jazükba chirnur 12 rongnung pa ya 8 buba lir. Pa lanuwa  Longkhüm, Mokokchung, Kohima aser Shillong nung school azüng.
Pa lanuwa linük tenzükba mapa nung alidang, 1950’s meta Shillong nung tepuokdak ayu aser yangji pai Yisuji pa Kümtetdakba aser Kibur ta agizük, aser pai Tsüngremer tajaba ola angashia pa taküm rangben Tsüngrem nem bendanga agütsütsü nangzük.
Tenangzükba balala yur pai theology azüng aser pa Calcutta Bible College, Union Biblical Seminary, Yeotmal, Haggai Institute for Evangelism Singapore aser Baptist Theological College of New South Wales Australia rejutem nung theology azüng.
Pa ya Missionary-At-Large ka ama July 19, 1987 nung Longkhum Baptist Arogoi commission sütsü aser September 23, 1990 nung ordain asü. Pai tenzükba wadang balala nung shilem tulu agiba pa taküm otsü jagi sayur.
1965 küm Amenla Lano den kibong aküm aser tena nem jabaso 2 aser jala 3 aser semchir 14 moaja lir. Tsüngrem taochi ajanga tenzükba wadang nung tarak meketi küm 50 shi inyaker tsürabur Rev. Lano Longchar June 20, 2016 nü anepdang 11:30 ako meta pa tangusashiba anener teti anisüngzükdaki ogo.
“Iba putu nung Rev. Lano Longchar otsü aser pai sayutsüngiba mangashidangerbo aika malitsü südi. Pa süaka, pa libaliro aser pai inyakba mapatem teti bilemtettsüsa tsüngnep yutsüogo. Aji oda, pa ama tamangtir aika adokjangma ta sarasadema atar”, ta tanü Rev. Lano den asü pila sentepi arur kati iba osangbener den jembidang ashi.