Rev.Lano Longchar mang ayimer

Dimapur, June 21 (TYO) : Chubaer osangbener, tanüla anir arusang, taneptsür aser sayutsüngir Rev. Lano Longchar iba lima nungi pilaa aoba osang angashia nisung aikati mangyim jashi lemsatepba osang metetdaktsüogo.
Item rongnung Nagaland Chief minister, Wb.T.R.Zeliangia asür Rev.Lano Longchar-i nisung aika tesama tia nungi anitetogo aser parnok takümtemji Yisu Khrista sülen anidakertem küma taküm piyong alibaji pa taküm kuli asütsü ta metetdaktsü. Asür Lano Longchar taküm alidang pai ashiba ama, asenok taküm kuli ka melira taküm alibaji amajok, pa taküm alidang pai Yisu Khrista osang tajung alima ajaklen sangdongtsü asoshi tanüla ain aketba lanurtem adokdaktsütsü asoshi kanga meranga inyakogo ta T.R.Zeliangisa metetdaktsü. Pa asüba agi asenok den o tanep agi saka tenla sabang nungibo tsüngmok ama ola adoka asenok  taküm Yisu Khrista mesüka alitsü, pei kiyongertem dang meimtsü aser Yisu sülen anidaktsü asoshi sayutsüngir ka samar asütsü ta paisa ashi. Chief minister-isa asür kinungertem den mangyim jashi lemsateper ta metetdaktsü.
Nagaland Health & Family Welfare Minister P. Longon-ia yashi Mokokchung nung Rev.Lano Longchar asüba osang angashia aoksar ta metetdaktsü.
“Asür Rev.Lano Longchar ya alima nung nüngtugu sayutsüngir aser tanüla anir arur Tsüngrem nisung tulurka liasü. Pa asüba yagi Naga nunger ajak aser ano talisa Khianmiungan nungertem asoshi kanga takoksa asütsü, kechiyong pa ya onok asoshi kanga tongtibang tanüla nung lenir ka liasü,” ta P.Longon-i metetdaktsü.
Paisa asür kinungertem den mangyim jashi lemsatepba osanga metetdaktsü.
National Highways, Mechanical Engineering aser Election minister, Wb.Nuklutoshi-ia Rev.Lano Longchar asüba ajanga Naga nunger rongnung akhüm tulu aketba Tsüngrem tenzüker ka samaogo ta mangyima metetdaktsü. Pa taküm alidang pai anibelem arema tangari matongba tesemtem aika tonga oagi Tsüngrem osang tajung prokba ajanga nisung aika temulung meyipdaktsü aser tamangertem rongnung telongjem adokdaktsü ta Wb.Nuklutoshiisa kuli agütsü.
Ano, Nagaland Rural Development minister, C.L.John-ia Rev.Lano Longchar asüba osang angashia mangyim jashi lemsatepba osang ka nung, ” Rev.Lano Longchar taküm aliba mapang pa mapa nung Tsüngrem aser nisungi temulung lemtettsüsa ochishia aser Tsüngrem mapa nung bendanga agüja inyakba tenzüker ka liasü,” ta metetdaktsü.
” Eastern Nagaland purtem aser talisa Konyak nungertem pa ajanga Yisu Khrista temeim osang tajung metet aser kümzük. Iba mapa tajung asoshi onoki teti pa dang pelaa bilemtettsü,” ta Wb.C.L.John-i metetdaktsü.
Wb.K.Hollohon-ia Rev.Lano Longchar asüba osang angashia aoksaba aser temulung shiranga bilemba osang ka metetdaktsü dang, ” Ni’ Rev.Lano Longchar ya Zunheboto nung 1970s mapang asentenshi sentong ka nung ajuru aser iba sülen ni’ pa metetba ajanga kü taküm tanüla jenjang kanga yanglushia temoatsü angu, iba atemaji ni’ kanga pelaa bilemer,” ta ashi.
” Pa asübaji kecha o agia temulung animesüngzüktettsü saka pa taküm alidang Tsüngrem sentong atalokdakja kanga junga liogo, iba jagi mulung süneper,” ta K.Hollohon-isa metetdaktsü.
Rev.Lano Longchar asüba osang angashia, ENPO telokia asür kinungertem den mangyim jashi lemsatepba osang ka nung, ” Rev.Lano Longchar asüba ajanga Naga nungertem asoshi tanüla anir arur sayutsüngir nungtugu ka samar asütsü,” ta tesasaba osang ka metetdaktsü. “Pa taküm alidang Eastern Nagaland nung aliba tesem ajaklen tonga oagi pai Tsüngrem temeim osang metetdakja jajaogo, pa den onok tesendaktep kanga junga liasü ,” ta ENPO  lenirtemisa metetdaktsü.