Rev.Lano Longchar pai tenzüksang Chuba kidangi ogo

Mokokchung, June 20 (TYO): Chubatem madak Chuba tenzüksang aser Yisu Khrista osang tajung abensang Rev.Lano Longchar tanü Hombar anüngdang 11:00 ako shi nung alima nungi pilaa pai tenzüksang Chuba aser Kibur kidangi ogo. Pa arishi küm 81 liasü.
Mapang khenpiga pa temang mejungi aruba sülen tanep pa temang anepalutsü asoshi Mokokchung civil hospital (IMDH)-i bener ao saka yangji lia mapang tatsüka tsüngda nung pa taküm arishi tembangadok.
Asür Rev.Lano Longchar ya alimai metetba nüngtugu sayutsüngir aser taneptsür ka liasü. Pa ajanga alima tesem balala nung tanüla tekümtet makai tesamar aliba takümtem aika temulung meyipa Yisu Khristaji pei taküm nung Kibur aser Kümtetdakba ta agizüka amangba purtem lir.
Ibaji dang masü saka pa ajanga Tsüngremi tasür shia arudaktsüba aser shiranger aneptsüba otsü aika lir. Item rongnung, 1977 küm January ita nung kenü Yimyu nung asentenshi sentong tuluka liasü. Idangji Khensa yimtak nungi arishi küm tenet tetsür chanu ka tasümang bener aru. Iba mapang pai lar tsüraburtem dang Tsüngrem O ashi aser kodang parnoki pei tai nangzüka temulung meyip, idangjisa par jala tasü nungi shia aru aser tzü meshia ajemba tatalokba otsü ka lir.
Ano 2004 küm November nung Bodoland nung taneptsü asentenshi sentong ka ayongzüka akadang, tetsü kati lar jala arishi küm 4 tain ka sür tasümangji Rev.Lano Longchar dangi bener aru. Ibaji Deobar anepdang liasü aser iba anepdang 3:00 ako shi nung laji süa adok aser la tasümangji pa dangi bener arudangbo anüngdang 11:00 ako liasü. Idangji pai tanutsüla tetsü dangji, “Nai Yisu Khristaji nü taküm nung Kibur aser Kümtetdakba ta agizüktsü mulunger asü ?” ta asüngdanga Tsüngrem temeim O ashi tenzükdang, lai “prabhu Jesu ” ta shia jepa sarasademtsü tenzük, idangji lar jala tasü nungi shia arua tenük lapok aser tetsü tsütsü shir menüremloktsüba tesüngmangtsü tatalokba ka liasü.
Item dakji alaka asen lima nung dang masü saka alima tesem aika nung pa ajanga Tsüngremi tanüla tekümtet aser shi nung taneptsü agütsüba kuli aika lir.
Asür Rev.Lano Longchar ya temulung memeyipi aliba mapang, Naga nunger yimten nüchiso bushiba mapa nunga Naga lanurtem rongnung tanishir ka liasü. Pa 1956 küm Naga Youth Movement nung tir liasü aser Federal Government of Nagaland nunga pa Accountant General liasü. Pa linük tenzükba mapa nung inyakba ajanga India sepaitemi pur Mokokchung, Kohima, Jorhat, Nowgoan aser Shillong nung tepuokdak yua liasü. Iba mapang Shillong tepuokdak lia pai pa kümzüksang Yisu Khrista ajuru aser iba anogo nung jagi Pa sülen anidaktsü nangzükba ama pai taküm piyong Pa tenzüka aruogo.
Pai tenzüka aruba wadangtem tongtibangtem rongnung 1967 küm pa ABAM nung Youth Worker liasü aser 1967 nungi 1974 küm tashi Baptist English School nung Administrator liasü.
Ao Theological Conference nunga pa 1966-67 küm tongti zülur liasü. Pai Mokokchung nung school ka tenüng agi, Bethesda Institute tenzük aser ano International Evangelical Fellowship nunga tongti zülur inyakba sülen tasünü tashi pa tir inyaka liasü.
Pa ya par yim Longkhüm Baptist Arogoi missionary inyaktsü shimtet aser 1990 küm ordain asüba Tsüngrem tenzüker ka liasü.
Tanü pai pa kinüngtsü Wt. Amenla Lano den taküm alir chirnur 5 aser semchisemnur 14 toktsür teti tatem maka tepela anisüngzükdaki ogo.
Pa den asü pila sentep sentong June 21, Mongulbarnep 10:00 ako nungi Multi-purpose Indoor Stadium, Mokokchung nung alitsü. Yangji sentong temer külen ano MTBA tenla kidang sentep ka agitsü. Iba sülenjiang pa mang par taso yim Longkhum-i bener tua aremtsü.