Rewati Chetri-i World Miss Asia University takok korang agizük

Rewati Chetri-World Miss Asia UniversityGuwahati, February 02 (Agencies): Assam tsür, Rewati Chetri-i China kübok Beijing nung ayonga agiba World Miss University 2016 tetoktepba sentong nung World Miss Asia University takok korang agizükogo.
La pusemertemi online ajanga vote agütsüba sülen Assam kübok Guwahati nung tentetba Guwahati Law College nung azünger, arishi küm 22 tain Rewati-i tematiba Super Six finalists rongnung densemtsü maongka angu.
Femina Miss India 2015 tetoktepba nunga Miss Popular aser Miss Multimedia takokba angur, Rewati-i nüngtugu Bollywood actress, Anushka Sharma aser Kangana Ranaut na sülen anidaka, Times Most Desirable Women 2015 nunga Top 50 nung densema liasü.
Ano külen, tetokteper nisung 70 shi den temaba jenjang ngua Peru tsür, Kelin Rivera Kroll-i Miss World University 2016 takok korang agizük aser taoba Miss World University, Mexico tsür, Karina Stephania Martin Jiménez-i Kelin dak takok korangji semtsü.
US kübok New York yimti nung tentetba World Miss University Organising Committee (WMUOC)-i 1986 küm nungi tenzüka iba tetoktepba sentong ya kümshi ayonga agir aser iba sentong nung alima linük balala nungi tetsür 70 shi kümshi shilem agir.
Kosovo aser Rwanda amala mepetmesü tensa ajurushiba linüktemi yimjung telok yoktsü nükjidong nung WMUOC-i iba tetoktepba sentong ayongba osanga jangjaogo.

You must be logged in to post a comment Login