Rex Tillerson-i Xi Jinping den ajurutep

September 30, 2017 nü Beijing nung US Secretary of State Rex Tillerson-i China Tir Xi Jinping den ajurutepdang agiba noksa ka angur.

Beijing, September 30 (Agencies): Honibarnü US Secretary of State Rex Tillerson-i China Tir Xi Jinping aser tanga ketdangsertem den ajurutepa shishilembaba, North Korea aser US Tir Donald Trump-i November ita China semdangtsü aliba onüktem benoka olemtep.
Tillerson-i China foreign policy adviser Yang Jiechi dang Trump aser Xi na kanga dang tesentaktep tajung yur mapa inyaka arur.
Taküm Florida nung aliba US president indang estate nung Xi aser Trump na ajurutepa senden amendang benoka olemtep ken o tem reprangshimtsü atema pai China semdanger ta Tillerson-isa ashi.
Tillerson-i US secretary of state ka ama tan agi tanabenbuba China semdanger. Pai Xi aser Yang na den ajurutepba dak alia Foreign Minister Wang Yi dena ajurutep.
Ajisüaka, osangbener sendentem nungbo Tillerson mesüra China ketdangsertemi North Korea indang onük mejembi.
North Korea-i nuclear weapons aser ballistic missiles tendangba atema parnok lennir Kim Jong Un aser US Tir Trump na tsüngda o agi raraba mapang ka nung China aser United States na tesentaktepji kanga tongtipang lir.
Trump-i Xi dang North Korea anema tenokdangbatem agütsütsü aser teyari magütsütsü ajungmesoa arur. Ibaji China-ia agizüker aser parnokia United Nations-i North Korea anema sanctions tasen kar agütsütsü agizükogo.
Brihostibarnü China-i North Korea nunger kibur sür lapokba businesses aser ventures ajak January ita tetenzüklen shibangtsü tetuyuba agütsüogo.
Ibaji masüdang China-isa January 1, 2018 nungi North Korea nem gas aser refined petroleum products ayokba ajemtsü metetdakja liasü.