RFEF tir menden atema Casillas tokteptsü

Madrid, Tsüklai/February 18 (Agencies): Spain nunger football asayar Iker Casillas-i pa Spanish Football Federation (RFEF) tir menden atema tokteptsü, ta Hobarnü metetdaktsüogo.
Election agitsüba anogo ano mesangdong saka Casillas-i par club Porto nem pa telemtetba metetdaktsüogo aser pa asaya nungi anentsü imlar.
“Election atema sangdongba sülen ni RFEF tir menden atema tokteptsü,” ta Casillas-i ashi.
“Asenok ajak senteper asenok federation ya alima nung football asaya nung temaba jenjangi ajungkettsü.
“Ni FC Porto tir nem osang agütsüogo, shiba dang ni kanga pelar,” ta paisa ashi.
Casillas ya par putu nung goalkeeper tajungtiba ka ta züngshir aser pa lenisüba kübok Spain team-i 2010 küm South Africa nung mezüngbuba World Cup koktetogo.
Pa Spain team nungi 167 ben asayaogo aser iba mapang 2008 aser 2012 küm Euro asayamung kokogo. Pa 2015 küm Porto nung oa maden tsüngda Real Madrid nungi 700 ben asayaogo aser iba mapang pai team den La Liga title pongu aser Champions League asemben kokogo.
2008 aser 2012 tsüngda Casillas küm pongu atonga FIFA FIFPro World XI nung züngoksema liasü.
Ajisüaka pa taoba küm April ita temulungjang timtem adokba sülen tang tashi nung khen danga asayaa mali.
Ita ishika joko Casillas RFEF tir menden atema inyaksangshia aruogo aser tang Luis Rubiales den tokteptsü renema lir.
“Onok tokteptsü asoshi bendanga agüja inyakdar. Vote agütsütsüpur 23,000 dak tema election agitsü asoshi atadar. Assembly züngsem 139-i telemtetba agitsü,” ta pai ashi.
Temzüng ozüng kübok election ya Tokyo Olympics sülen taküm küm shilem tanabuba nung agitsüla ajisüaka Euro 2020 masaya tsüngda election agitsü atema Rubiales-i mepeshiogo, koba June 12 nungi July 12 tashi asayatsü.