Rhitso Mero-i Barak FC NSF Trophy final-i ani

Kohima, October 19 (TYO): Asaya tatemtsü lia substitute asayar Rhitso Mero-i goal ka idakja taoba mapang iba asayamung koker aliba telok Barak Football Club Peren pur tang tasayadak students’ memorial trophy nung final tongtetogo.
Tanü asaya nung Barak FC puri taoba küm runners-up Forerunners 4th NAP Thizama pur goal ka agi akok.
Asaya mezüngbuba shilem nung telok anapronglai goal agütsütsü asoshi maongka ngutetaka ka danga magütsütet
Lemon break sülen telok anapronglai goal idaktsütsü asoshi kanga meranga asaya aser tatem nung Rhitso Mero-i minute 83buba nung goal ka idakja parnoki iba asaya akok.
Asaya nung Forerunners nungi asayar Vekruto, Purakum aser Vikidozo nunger nem minute 34, 36 aser 86buba nung yellow card kaka agütsü aser Barak FC nungia asayar Kakai Kuki nem minute 73buba nung yellow card ka agütsü.
Iba takok ajanga Barak FC pur defending champions Nagaland Police Red pur den October 21 nü final asayatsüba atema jangjaogo. Forerunners pur atemaa parnoki jenjang tasembuba atema Tangkhul Students Union Manipur den asayaba kokra parnoka takok nung tembangtsü.
ASU-i exhibition match nung AYO akok:
Tanü exhibition asaya nung goal 2-2 agütsür tembangba sülen tiebreaker ajanga 4-3 agi Angami Students’ Union (ASU) puri Angami Youth Organization (AYO) kokogo.
Asaya nung mezüngbuba goal AYO nungi asayar Neidilhoutuo Neibu Sechü-i idaktsü aser iba sülen par telok nungisa asayar Zekusetuo Natso-i asaya tanabuba shilem nung tanabuba goal idakja parnok temaba jenjang nung toktsü. Ajisüaka ASU puri kanga junga asayaa captain Mego Ratsa aser Tseituo Mere nati goal kaka agüja score 2-2 nung asaya tembang aser Penalty asayaba nung ASU puri 4-3 agi akok.
October 20 nü tasembuba jenjang atema asaya yamai alitsü:
Tangkhul Students’ Union vs Forerunners FC @ 1:30 PM