‘Ricksharani’ kensep agi ‘rickshaw’ anirtem tushir

New Delhi, April 30 (Agencies) : Airtel 4G ajungkettsüla, Sasha Chettri-i “Ricksharani” kensep sayatsü renema lir, aser iba kensep ya rickshaw anishirtem asoshi sangro ka mesüka lir.
“Ni Mumbai nung mapang talangka tesünep aser sen bushiba nung mapang intoka liasü. Ni ki aiben belena kiyong ka nungi kati oa liasü. Ni iba amaji jajaba mapang rickshaw tem den mapang aika intok. Ni tang sayatsü aliba kensep tenüng ajanga anogo shia kangasa meranga inyaka, yimti nung teyari agütsürtem, rickshaw anishirtem nem tenüngsang aser tetushi agütsür,” ta lai osangbenertem dang ashi.
Iba kensep ya May ita nung sayatsü aser kensep nung aliba kenji komala ta asüngdang dang lai, “Kensep nung aliba kentemji kanga tekara dang….Bollywood tsüngsangba kentem mesüker!’ ta lai langzü.
“Kü ken single ji reprangdangang, iba ken nung Sachin Gupta-i acha ayangtsü aser Adil-i choreograph asü. Iba single ken tenüngji ‘Besharam’ lir,” ta laisa ashi.
“Ni rickshaw anishir kati pa taküm otsü agi kanga ajungmeso. Paji arishi küm 32 tain aser taküm jenjang tajungba akümtsü amanger nisung ka liasü,” ta Sasha-i ashi.
Iba rickshaw anishisang jagi, “ni rickshaw anishia sen aaba ajanga khenü anogo kü nija shishilemba mapa tenzüktsü,” ta ashiba laia osangbenertem dang metetdaktsü.
“Pa kanga tasü tait aser tashi tait nisung ka liasü aser pai pa den Tsüngrem dena lir aser pa Tsüngrem tembar ta ashi. Ni kodang aji angashi, ni kangasa pela bilem. Ni Mumbai nung ajangshia metetba ajak kecha mali amai kümdaktsü,” ta Dehradun tsür, Sasha-i ashi.
Arishi küm 24 tain, Sasha-i model aser acting asüba den ken-a atener.
“Ni lanuwa asüba mapang nungi ken tena liasü. Ni acting kanga sapur. Ni teti kü sasa ken zülua liasü aser iba mapang nisung kari ni ajungshiba ajanga model asütsü tenzük. Ni item mapa ajak inyakner, ajisüaka shitakba shidi süra ni kentenba tejangraba aser iba jagi ni peladaktsür,” ta lai ashi.
“Ni arishi küm 13 asüba mapang nungi guitar atemer. Ni kiyim benjong aser ano tanga sentongtem nung ken ajanga shilem agia liasü,” ta “Katti Batti” film nung shilem agilai ashi.
Lai, “Ni film kar nung inyaktsü bilemdar aser ken-a kar atentsü,” ta tesüiba mapang army ketdangserer jalai ashi.