Ricky Martin-i pa kiyim benjong tulu asütsü ama bilemer

Los Angeles, November 18 (Agencies) : Küm ka shi medema arur tawa ang artist Jwan Yosef den kibong akümtsü atema aniasüngteper alisang, kentener Ricky Martin kanga pelar kechiba süra 2015 June ita nungi tebur o tebur na aser tetsür o tetsür na (gay) kibong akümtsü temelaba agütsüba sülen pai bilemba ama sentong yanglutettsü maongka angur.
“Gay tem kibong akümtsü temelaba agütsüba sülen nia khenübo temoyong nung küri ayoker kinunger aser medemertem jaoka Latin yimya nung pelateptsü imlaseta liasü,” ta Martin-i people.com dang ashi.
“Kü kiyim benjong nung Middle East aser Latin yimyatem nung pelateptsü. Iba benjongji kanga tuluka asütsü,” ta pai shisem.
Arishi küm 44 tain, Martin-i, Yosef küna tesendaktep kanga tashi ita lir kechiba süra kechisarena ajak jangratemtsüka aser magic mesüka lir, ta ashi.
“Nai aginüba kar atalokdang na pelaba ama nia tang ya kangasa pelaba mapang ka lir. Tang atalokbatem ya asangsang aser tejangja,” ta Martin-i ashi.
Arishi küm 8 tain, jakrep jabasotem, Matteo aser Valentino, tebu, Martin ya kiyimtsü atema renemba den repa Las Vegas residency atema inyaktepdar.
Kentensang, Martin-i ashiba agi, tesüiba mapang Las Vegas nung pa nem kenten sentong ka agitsü maongka agütsü, ajisüaka mapang mesütepba ajanga magitet. Saka tangbo pai kenten sentong agitsü renema lir.