S-Hertogenbosch, June 08 (Agencies): India nunger Rohan Bopanna aser pa den külemi asayasang, France nunger Nicolas Mahut nati takok ngua, tang tasayadak Ricoh Open tennis asayamong tebur doubles quarterfinal asayatsü jenjang tanü, Bodbar nü nguogo.
Tan asayamong nung temaba jenjang abener, Bopanna o Mahut nati tanü minute 50 shi nung points 6-1 6-4 ngua Netherlands nunger Robin Hasse aser Spain nunger Guillermo Garcia-Lopez na tetenzükba round asaya nung tsükdaktsü.
Tawa adoktsüba ATP doubles asayar tarensen top-10 nung densemba ajanga tetendangba kecha magi Rio Olympics nung shilem agitsü jenjang angusang, Bopanna den teti asayasang, Romania nunger Florin Mergea-i Olympics atema terenemshitsü agitsü tenzüka, külem sensopur, Horia Tecau den lungjemer asayatsü tenzükba yong Bopanna-i World No. 1, Mahut den tan lungjemer asayatsüsa aküm.
Ano külen, Bopanna-i pa den lungjemer Olympics nung asayatsü asoshi asayar shimba osang tanü tashi metetdakja mali saka pai külem sensopur, Leander Paes mesüra Saketh Myneni na rong nung ka shimtsü akok.
Bopanna o Mahut nati Luxembourg nunger Giles Muller aser Denmark nunger Frederik Nielsen na den quarterfinal nung ajuruteptsü.
Muller o Nielsen natia par tetenzükba round asaya nung points 6-3 6-3 ngua, Brazil nunger Marcelo Demoliner aser America nunger Nicholas Monroe na madak takok angu.
You must be logged in to post a comment Login