RIIN ajanga Nagaland nung ILP mapa tajungba inyaktettsü

Kohima, August 12 (TYO): Register of Indigenous Inhabitants of Nagaland (RIIN) ajanga state nung aser talisa Dimapur district nung Inner Line Permit (ILP) maparen akangshitsü ta Nagaland Chief Secretary, Temjen Toy-i ashi.
Abhishek committee-i Dimapur district nung ILP benokts atema tebilembatem agütsüba nung ajemdaker state sorkari state nung lisopurtem jangjatsü nüngdak ta ajitet aser iba jagi RIIN renemtsü osang metetdaktsü, ta tanü Chief Secretary-i osangbener den jembidang ashi.
Ozüng alema aruba khuret atema Naga kin hoho aikati aser kaketshir teloktemi Dimapur district nunga ILP mapa inyaktsü takhangba agüja arur, ta paisa ashi.
Ozüng alema arurtem yagi lisopur asoshi lendong bentsür arutsü aser iba atema ILP system tajung ka nüngdaker. 1979 küm Dimapur ya lisopur alidak ta sangdongba sülenbo ILP mapa tenzüktsüba liasü. Kin hohotem aser civil society temi ashiba ama tanü sorkari Dimapur nunga ILP benoktsü mulunga agizükogo, ta Temjen Toy-isa shisem.
Iba jagi ILP mapa meinyakdang tamasa RIIN yanglutsü nüngdak ta ajitet. RIIN mapa inyaktsü atema inyakyim shitak latettsüla ta Naga kin hohotem aser civil society teloktemi ashiba agi sorkari Banuo Z Jamir-i anir RIIN commission ka tentettsüogo, ta paisa ashi.
RIIN ya teinyakdak maparen ka lir aser enumeration process dak alaka anena mali. Banuo Z Jamir Commission-i agütsüba report sülen enumeration process tenzüktsü. Parnoki taruba ita report agütsütsü, ta Chief Secretary-isa shisem.
December 1, 1963 nü Nagaland state mangudang arur non-Naga inhabitants aser 1979 küm Kohima kübok Dimapur sub-division ya ‘tribal belt’ ta züngokba masüdang arurtem indang temetentem kümzüka ayutsü, ta paisa ashi.
RIIN ajanga mezüng Nagaland state nung aliba Naga lisopurtem jangjatsü. Iba maparen ajanga 1979 matongdang Dimapur nung arua alirtem aser ano December 1, 1963 matongdang arua aliba non-Naga nungertem jangjatsü, ta Nagaland Chief Secretary-isa metetdaktsü.
Non-Naga nungertem ‘indigenous inhabitants’ ta mezüngoktsü saka parnok state nung ‘domicile mesüra permanent residents’ ta züngshitsü. Nisung balala maitsü jangjaba ajanga Inner Line Permit (ILP) mapa shitak inyaktettsü kechiyong ketdangpurtemi IT-enabled ILP system ka yanglutettsü. Iba nung records shitak aser ILP holder tem indang data tem züluoka alitsü, ta paisa ashi.
RIIN atema shimba Banuo Z Jamir commission-i cut of dates tebilemba shidangtsü aser iba atemaji public-i jembitsü. Sendaktepa alir ajaki mulungtepba sülen ang RIIN ya mapa küma inyaktsü, ta Temjen Toy-isa shisem.
Iba mapang Principal Secretary, Home, Abhijit Sinha dena liasü aser paia RIIN ajanga chichiba senso shinga bendanga mamshitsü mesüra ILP aginürtemi timtem majurutsü ta metetdaktsü.