RIIN ya senso kar yirutsütsü atema masü: CM Rio

Aug. 15 nü Secretariat Plaza nung I-Day sentong nung CM, Neiphiu Rio-i Parade Contingents reprangba noksa nung angur.

Kohima, August 15 (TYO): India linük tesem ajunga den liromedema Brihostibarnü Nagaland nunga 73buba Independence Day mongogo.
Tanü Secretariat Plaza, Kohima nung iba anogomong sentong nung jembidang Chief Minister, Neiphiu Rio-i, “Register of Indigenous Inhabitants of Nagaland (RIIN) mapatong ya Nagaland nung lisopurtem maitsü junga jangjatsü, aser akhidang nungi state nung alirtem jangjatsü atema lir, koba ajanga Inner Line Permit (ILP) inyakyim junga benoktettsü,” ta metetdaktsü.
“Ozü sorkari nüburtem taküm jenjang ajungkettsütsü atema tongti süa inyaka arudar, aser nüburtem temeden kümzüktsü atema asalentonga inyaker,” ta pai metetdaktsü.
Iba dak sendakba nung CM-i, Dimapur densema state tesem ajunglen ILP benoktsü atema akhangba onükji lenla ajungalen nungi shisadangba sülen sorkari Dimapur nunga ILP benoktsü lemteta nüngdakba telatetbatem/ozüngtem yanglutsü atema maparen tenzükogo, ta ashi.
Paisa, asen nüburtem jangjatsü aser Nagaland ya pei ki ama küm aika lia arur sensotem jangjatsü nüngdak ta sorkari bilemer; ozüng alema arurtem aser temsüa malirtem nem indigenous inhabitant certificate agütsüba tebilemtsü anentsü atema item amaji jangjatsü nüngdak, ta ashi.
Iba dak sendakba nung RIIN mapatong tenzüktsü atema sorkari lemteta June 29, 2019 nü iba osang sangdongba sülen tribal hohos, lokti tentettem aser nija aikati tebilemba balala lemsatepogo, ta pai ashi.
RIIN dak sendakba onüktem ajak reprangshitsü atema sorkari züngsem asemi akümba commission ka tentetogo; parnoki maneni metetpelaa jembiba sülen onüktem benoktsü, ta paisa ashi.
Commission-i benokba onüktemji Assembly nung benoka o lemteptsü aser nüburtemi agizüktettsüsa inyakyim tatem küma latettsü, ta paisa shisem.
“RIIN inyakyim ya kar bendanga züngshitsü mesüra senso kar yirutsütsü atema masü, saka Nagaland nung aliba lisopurtem jungjunga jangjatsü aser state nung permanent süa alirtem jangjatsü atema lir, koba ajanga ILP inyakyim nung yaritsü,” ta paisa metetdaktsü.
Naga yimtenren ken o dak sendakba nung CM-i, “Mapang talangka asenok yimjung maliasü, anungji yimtenren ken o tekaraba nung jembia akhümketa latettsü atema asenok longjemtsü mapangji tang mapang ya lir,” ta ashi. Rio-isa India sorkari Naga nunger putiotsüji khenyongi balaka, ta agizükba den külemi Arrla 371A ya Nagaland nung alirtem dang tsüngchia nangzükba lir, ta ashiba atema India sorkar dang pelaba lemsatep.
CM-isa police, sorkar ketdangsertem aser nijatem nem awards/medal balala lema agütsü.
CM-i jembiba onük aika rongnung: PTS Chumukedima nung constable trainees 300 atema multi-storied barrack yanglutsü, Kohima nung IGP (Int) office tasenba, PTS Chumukedima nung CCPWC laboratory amenokba, Ato kilonseri New Model Degree College, Wakching nung Administrative & Academic building semzüktsüba, Kohima Science College, Jotsoma nung Atmospheric Science Research Centre amenokba, student scholarships atema special cell tentettsü, Common Scholarship Portal tenzükba, Agri Expo site, Dimapur nung Air Conditioned Market yangluba, Special Road Development Programme kübok projects 48 renemba, NABARD kübok kilometer 64 lenmang teyangludak, Saubhagya Flagship Programme kübok yimtsüngtem nung kibong ajak nung electrification, jila 9 nung IT enabled Metering, Billing & Collection renemba, jila 12 nung Integrated Power Development Scheme benoka inyakba,  Kohima nung   Software Technology Park of India renemba, e-Governance Academy of Nagaland atema e-Governance Academy of Estonia den MoU sign asüba densema lir.