Rijiju-i Nehru anema tiyazü osang proker: Gogoi

Guwahati, November 01 (Agencies): Deobar nü Assam Chief Minister, Tarun Gogoi-i, Union Minister of State for Home Affairs, Kiren Rijiju-i “1962 küm Indo-China rara mapang Jawaharlal Nehru-i Northeast tesem nung aliba nüburtem sentoka yutsü,” ta jembiba ajanga tiyazü osang proker, ta aitsüogo.
“China-i anema apusoba mapang Jawaharlal Nehru-i linük surrender asü ta Rijiju-i jembiba amaji masü. Nehru-i nüburtem mesentok aser iba ama koda masüba mapang nung pa nüburtem den liasü,” ta Assam chief minister-i ashi.
“Linük kanga meimer aser Nationalist nung akhanga aliba Nehru-i Rijiju ama pei state ashioktsür aser pei state atema terenlok mapa kecha meinyaktsür ka dang nungi iba atemaji kulikaket nüngdaktsü asü (?),” ta tanü Guwahati nung Gogoi-i sangdong ka ajanga ashi.
Congress yimsüsüba mapang nung Arunachal Pradesh tentet aser terenlok aika aru ta Rijiju-i temulungjang nung ayutsüla, ta Gogoi-isa ashi.
“Arunachal Pradesh ya Congress yimsüsüba mapang tentet (state jenjang) aser iba sülen iba state terenlok aser azükaru lenmang nung jajatsü tenzük,” ta pai ashi.
“Taoba NDA sorkari Arunachal atema kechi inyakja ali (?) Tang Centre nung aliba minister kwi-i Arunachal semdanga ali, aser tongtibangsüa state terenlok atema kechi inyakja ali (?),” ta Assam CM-isa asüngdang.
Deobar nü Rijiju-i, India mezüng Ato kilonser Jawaharlal Nehru-i 1962 küm India aser China rara mapang Northeast nüburtem sentoka toktsü, ta jembia liasü.
Rijiju-isa, iba mapang nung Nehru-i Parliament nung jembiba oji Arunachal Pradesh (tamalen Assam shilem ka) nüburtemi kodanga mamatsü, ta jembia liasü.
“China nungeri anema apusoba mapang Parliament nung o toktepdang taoba Ato kilonser Jawaharlal Nehru-i, ‘Ladakh aser Arunachal nung aliba ali temo maliba li aser tenem nung aijang kata memeyir, (anungji) kechiba Parliament nung mapang intoktsü’ ta jembi,” ta Rijiju-i ashi.
Paisa, 1962 küm Assam shilem ka aliba, Arunachal Pradesh anüdoklen ajak China-i agiadok, aser ibaji atangji, ta shisem.
“Atangji, ni kanga akhümtsübua alisang, Jawaharlal Nehru-i Arunachal Pradesh nüburtem mulungjang kanga amsadaktsüogo,” ta Rijiju-i jembia liasü.