Rijiju-i Novy Kapadia nem sen lakh 4 agütsü

New Delhi, Metsüremi/March 16 (Agencies): Sports Minister Kiren Rijiju-i Hombarnü veteran football expert aser commentator Novy Kapadia nem pa temang anepaluba nung mesemtsü atema sen lakh 4 agütsüogo. Kapadia tang kanga mejungi shirangdar.
“Temang anepalutsü atema nüngtugu football asaya nung mongin Novy Kapadia nem sen lakh 4 agütsüogo,” ta Rijiju-i Ministry of Youth Affairs and Sports indang shiti ka dener lemsatep.
“Nisung timba ajangzükdaktsütsü asoshi DUW Fund nung provisions tem melenshiogo. @narendramodi sorkari India nung saisapong balala tenzükertem nem teyari agütsütsü bendanga agütsür lir,” ta minister-i shisem.
Iba teyari ya ‘Pandit Deendayal Upadhyaya National Welfare Fund for Sportspersons kübok agütsüogo.
Taoba mapang minister-i iba ken o takaratiba nung reprangshitsü nangzüka liasü.
“Iba ken o angazükogo aser süoki ia agidar. Ni takaratiba nung jenjang tapet agitsü, ” ta Delhi Football tir Shaji Prabhakaran-i Novy Kapadia jenjang indang rasaa shia tweet asüba sülen pai iba telangzüba agüja liasü.
Arishi küm 67 tain Kapadia, motor neuron tashidak agi atongba sülen par kidanga teyari medeni senzüsenpong mesüteter. Iba tashidak ajanga tekelok aser spine nung tezü mapa minyaki kümdaktsür.
Kasa mapang nung küm ana tejakdang Delhi University nung professor mapa nungi anenba sülen pa tang tashi pension mongui lir.
Novy Kapadia ya nüngtugu sports historian, commentator aser mongin ka lir aser pai FIFA World Cup teku tashi ayimjema inyakogo. Pai football asaya indang kanga junga meteta aliba ajanga pa ya linük nung football expert rongnung tajungtiba ka lir.