New Delhi, March 4 (Agencies): Taoba ita alima nung smartphone rongnung dalangtiba, sen 251 agi ayoktsü sangdongba, Noida nung amena aliba Ringing Bells Pvt. Ltd anema Advantage Computers’ (Adcom)-i ken o ka benoktsü ta Hokolbarnü metetdaktsüogo.
Iba smartphone ayoktsü sentong Delhi nung lapokba mapang Bharatiya Janata Party (BJP) nung lenir Murli Manohar Joshi-a dena liasü. “Freedom 251” lapokba mapang Ringing Bells-i iba phone kar osangbenertemi nem lemtsübaji Adcom indang handset tem liasü, ta Adcom ngutetsang aser mendenbuba Sanjeev Bhatia-i ashi
Ringing Bells Tir, Ashok Chadha-i, onoki osangbenertem nem Adcome handset agütsübaji ‘symbol’ atema agütsüba dang lir ajisüaka chichiba Freedom 251 smartphone nungjibo onoki ashiba ajak keta yanglutsü, ta ashi.
“Onoki yanglutetba phone ka sen 251 alang amai lemshia agütsüba ajanga onok kanga mepelar aser ibaji ajanga onok akoksa-aka onoki ozüngi melaba ama parnok dak inyaktsü,” ta Hokolbarnü Bhatia-i sangdong ka ajanga ashi.
“Onoki nisung lakh aika dang ayokba medem item phone temji taoba mapang Ringing Bells danga ayokba osangji shitak lir. Ajisüaka parnoki iba phone jenjang balaka agi tanaben yokshitsü sentong onoki khenyongi memetet liasü,” pai shisem.
“Item phone temji Ringing Bells dang ka nung sen 3,600 agi ayok saka parnoki sen yamaji ajemer ayokbaji onoki tang tashi masadangteter,” ta Bhatia-i ashi.
Noida ketdangsertem den ali tsütsü mangatettep kar adokba ajanga Brihostibarnü Noida nung aliba Ringing Bells office tem ka danga melapok.
“Onok office office B-44, Sector 63, NOIDA 201301, Uttar Pradesh nung lir aser iba ali atema mangatettep adokbaji ali kibur aser Nodia ketdangsertem tsüngda lir,” ta company-i jangjatsüogo.
Enforcement Directorate (ED)-ia tan hopta ang Ringing Bells CEO, Mohit Goel dang Freedom 251 phone jenjang atakba yimya asüngdanga liasü.
Freedom 251 phone jilia mangartem ket phone atongba sülenang company-i sen agitsü, ta Chadha-i taoba mapang metetdaktsüogo.
June 30 tashi nung parnoki phone lakh 25 tongtsütsü metetdaktsüogo.
Parnoki iba phone ya “Make in India” aser “Digital India” den sentaktepba mapa lir ta ashi ajisüaka sorkari iba mapa nung parnok teka mali ta metetdaktsüogo.
You must be logged in to post a comment Login