Ringing Bells-i Freedom 251 phone 65,000 yoktsü tenzükogo

New Delhi, August 2 (Agencies) : Freedom 251 smartphone yangluba company,  Ringing Bells-i sen 251 alang smartphone 65,000, phone manga alirtem ket tongtsütsü tenzükogo.
July ita nung parnoki iba smartphone 5,000 iba phone alirtem ket tongtsüogo.
Taküm Februray ita nung parnoki iba sen dalang phone yanglua ayoktsü osang agütsüba sülen company anema olulu aika adok aser karibo iba inyakyim ajanga nisung külakoktsütsü ta shia liasü. Ajisüaka parnoki nangzüker mapang talang ka lir külen iba phone 5,000 July ita nung tongtsüogo.
Hombarnü nungi tenzüka Ringing Bells-i phone manga alirtem nem iba kasa smartphone 65,000 tashi India tesem balalai yokdar.
Parnoki iba phone yokba tesemtemji West Bengal, Haryana, Himachal, Bihar, Uttarakhand, New Delhi, Punjab, Jammu & Kashmir, Maharashtra, Madhya Pradesh, Jharkhand, Rajasthan aser Uttar Pradesh state tem lir.
“Ringing Bells-i nangzükba ama onoki iba phone 2,00,00 tashi customer ket tongtsütsü renema lir. Onoki iba phone manga alirtem lottery ajanga shimteter phone tongtsütsü tenzükogo,” ta company sangdong ka ajanga metetdaktsü.
Taküm February Freedom 251 phone sayaba sülen nisung crore 7-i iba phone manga liasü.
Parnoki iba smartphone ki tongtsüba atema sen 49 talila agitsü aser sen ajak phone agi customer ket atongba sülenang meshitsü.