Ringo Starr-ia ‘Brexit’ nungiter

Los Angeles, July 03, 2016 : Tesüiba mapang Beatles telok nung drum atemsang Ringo Starr-i, “European Union (EU) mezüng tentetba mapangbo nia kanga junger ta bilema liasü, ajisüaka dangbo ni Britian-i ‘Brexit’ mera agiba pusemer,” ta ashi.
Brexit ya “British exit” tatsüba agi amshiba olung lir. Tawa Britain-i EU nung madentsü ta telemtetba agiba sülen iba olung ya amshitsü tenzük.
Starr-i, Britain EU nung joko madentsü telemtetba agiba nungiter, kechiba süra iba ya ajanga Britain pei tetsüng agi nokdaktettsü,” ta ashiba mirror.co.uk osang ajanga ashi.
“Iba telemtetba ya kanga junger. Mezüngbo ni EU kanga sapua liasü. Ni Europe tesem aika nung lidangogo aser ni EU ji kanga junger ta bilem. Ajisüaka iba telok bilemba ama masü asü. Business tsütsübo kanga junger, saka linük ajaki pei wako ang ajungketnü….. iba jagi temeimtep kangabo mali aküm,” ta Starr-i ashi.
Pa tang Los Angeles nung alir aser arishi küm 75 tain, Starr-i, ni Liverpool-i khen khen dang aoer, ajisüaka kü taso yimti kü mulung nung teti lir, ta ashi.