Ringo Starr indang Drum Kit US sen million 1.75 yong yokogo

December 07, 2015: Taoba mapang nüngtugu kentener telok, ‘Beatles’ indang osettem mapang shia charity, The Lotus Children Foundation atema auction süa arur.

Taoba mapang Beatles Drummer, Ringo Starr-i 1960s mapang kenten sentong 200 dak tema nung amshiba drum US sen million 1.75 yong yokogo.

Ringo Starr aser pa kinüngtsü Barbara Bach nati iba auction nungji nüngo oset 800 shi yokogo. Iba senji parnok indang charity, Lotus Children Foundation atema amshitsü.

Iba drum kit ji millionaire ka aser Indianapolis Colts nung NFL team kibur, Jim Irsay-i alizük. Starr-i iba drum kit ji ‘Can’t Buy Me Love’ aser ‘I Want to Hold Your Hand’ nunger ama nüngtugu ken aika nung temogo.

Irsay ket nung Beatles züngsemtem- John Lennon, Paul McCartney aser George Harrison nunger indang guitar-a kaka lir. Iba tetezü pa indang collection nung Beatles züngsem ajak indang nüngo oset pa ket nung

abensaogo.

Beatles züngsem ajak indang nüngo oset pa ket nung bendentetba dak sentakba nung Irsay-i, “Tatemsa küm 45 sülen Beatles ano tanaben longjemogo,” ta ashi.

Ano kasa auction nung Starr indang The Beatles’ White Album first edition copy serial number 0000001-a yokogo. Iba kensep ajanga US sen 650,000 yokzük.

Starr-i ashiba agi, pai iba kensepji London nung aliba Bank ka nung küm 35 dak tema yua liasü.

Iba kensep ajanga auction nung kensep ka nung sen timtiba yokzükba otsü yangluogo. Iba kensep mayokdang White Album indang kensep ka US sen 30,000 yong yoka liasü. Iba copy ji serial number 0000005 liasü.