Rio: 129 buba IOC senden tenzükogo

Rio de Janeiro, August 02 (Agencies): Brazil kübok Rio de Janeiro yimti nung tentetba Cidade Das Artes nung 129 buba International Olympic Committee (IOC) senden yashi, Hombar nü nungi tenzüka amen tenzükogo.
Rio 2016 Organizing Committee aser Rio yimti sorkar nati 2016 Rio Olympics takok ngua agitsüsa bendanga agüja inyakba atema pelaba olen ka IOC Tir, Thomas Bach-i yashi senden lapoktsüdang metetdaktsü.
“Yimtenren, rongsenren aser sobaliba ken o nung ajemdaker Brazil linük nung tebangdang adokba mapang ka nung Rio de Janeiro yimti nung 2016 Olympics ayonga asayaba ajanga par linük nung temelenshi tulu angutsü imlar. Tan Olympics asayaba ajanga alimai Rio yimti teti bilemtettsü,” ta pai ashi.
Ano külen, “Tan asayamong nung Russia’er athletes ajunga nem shilem magidaktsüi nokdangtsü lemtetbaji tim masüba telemtetba ka lir,” ta pai sangoktsü.
Russia sorkari pusema, par asayartemi ozüng alema tali tashi itshitsü mozü mora achiba osang ka World Anti-Doping Agency (WADA)-i sangoktsüba sülen ozüng alema mozü mora achiba tendangba tentet balalai Russia asayartem anema 2016 Olympics nung shilem magidaktsütsü tenokdangba benoktsü onük benoka lir.
Tanü tashi nung ozüng alema mozü mora achiba ken o nung ajemdaker Russia nunger asayar 100 shi anema Olympics nung shilem magitsü tenokdangba benokba osang bushiteta lir.
“IOC-i telemtetba tasak agitsüsa jenjang ajurua lir. Ozüng alema mozü mora achiba ken o ji kanga dang ken o taret asüba yong Russia asayartem metentsütsüsa IOC-i meinyakteti lir. Ano külen, asayar ka nem pei metentsü atema kuli agütsütsü maongka magütsütsü lemtetbajia tim masü,” ta Bach-i shisem.
Tan August ita 5-21 nü tashi asayatsü ayongba 2016 Rio Olympics nung shilem agir asayartem nungi natzü tendangtsüren 4,500 aser azü tendangtsüren 1,000 shi agitsü asoshi IOC-i renema lir.