Rio anema agütsüba ken o nung obendang magütsüi ayu

Kohima, Aug 22 (TYO) : Taoba Nagaland chief minister aser tang Lok sabha MP Neiphiu Rio-i pa 2014 küm Lok sabha electioni aidang pa tazüngba jenjang tiyazü talila agütsü ta aija okadak ken o benoka aliba ya tang Chief Judicial Magistrate (CJM) Kohima okadak masü saka tanga okadak ka nungang agitsüla, kechiyong CJM Kohima-ji Rio anemer NPCC nung tir K.Therie-er kinunger lir ta benoka mepishiba ken o angadanger külen Principal District & Session Judge Kohima, Moangkaba Imchen-i obendang magütsüi yuogo.
Iba ken o ya Rio anema Rosemary Dzuvichu-i agütsü aser tanü tenaprongla okatsürtemi ken o jembiba angadanger külen obendangeri obendang magütsüi sota ayu.
Rosemary Dzuvichu-i February 11, 2016 anogo nung CJM Kohima okadak Rio-i Lok sabha election nung pa tazüngba jenjang tai agütsüba ken o benok.
Iba ken o angadangtsü asoshi June 27 nü CJM Kohima Mezivolu T. Therie okadak anogo latet, ajisüaka Rio tenüng nung okatsüri kasa ken o ya Principal District & Session Judge okadak dang jembitsüla, kechiyong CJM Kohima okadak ochiobendang mengutettsü ta temulung melemi bilemba o ka benok
Rio asoshi okatsür advocate Ashipri Zho-i CJM Mezivolu nungi Rio-i ochi obendang mengutettsü, kechiyong la ya NPCC tir K. Therieh’er kinunger lir, anungji iba ken o ya okadak mashi kati bener aotsüla ta mepishia liasü.
Ajisüaka, Rosemary asoshi ken o jembitsür advocate Akito Zhimomi-i ashiba agi, Rioi iba ken o jembiba ya menudaktsüner aser CJM anema ken o prokba ajakji tiyazü liasü ta metetdaktsü.
Paisa Rio aija jembidang ashiba agi, Rio-i iba ken o pai mulungba tesem ka nung kanür, kechiyong idakji dang pai aginüba obendang angutsü, ajisüaka iba ken o ya tanga okadaki bener maotsüla ta mepishia metetdaktsü.
Ajisüaka, ken o ajak anaprongla nungi angadanger Principal District & Session Judge, Moangkaba Imcheni obendang magütsüi sota lir.