Rio aser Alemtemshi nati Naga lanurtem ayongzük

Kohima, February 27 (TYO) : Naga nunger lanurtem takotet akümtsü atema tangatetba tajung aser tenangzükba ayutsüla, ta Nagaland nungi Lok Sabha MP, Neiphiu Rio-i tayongzükba agütsü.
Nagaland Youth Summit anogo ananübuba nung Rio-i ashiba ashi, “asenoki langka ataloktsü atema ataa dang lira, kodanga mataloktsü.”
Naga nunger sempet aketba lanur aika lir aser wadang balala nung mapa tulu inyakteter, ajisüaka asenok dak tenangzükba aser bendanga agüja inyakba mali, ta paisa ashi.
Rio-isa state sorkar aser lennirtem dang, “Naga lanurtem yaritsü kechiyong parnokji asen tarutsü lir,” ta mepishia metetdaktsü.
“Centre sorkari linük nung lanurtem ajungkettsü atema Make in India aser Skill India mapatongtem tenzüka lir aser Naga nungertemia iba maongka agitsü renema alitsüla. Centre-isa RURBAN ta ser Rural o Urban meyokteper mapatong ka tenzükogo,” ta Nagaland nungi Rajya Sabha züngsemi metetdaktsü.
Naga yimten tebilemtsü atema telemtetba ka magiteti aliba ajanga Nagaland state nung terenlok aser tejakleni aotsü atema inyakba mapa nung timtem ajurur. Ajisüaka, Framework Agreement agiba ajanga tang joko iba telemtetba agitsübaji nübortem ket nung lir. Asenoki iba onük ya jenjang kasa nung dang meyuli, saka asenok ajak longjemer aser putepshir telemtetba ka agiba ajanga Naga nunger lanurtem asoshi tarutsü tia yanglutsütsü, ta Rio-isa ayongzük.
Iba sentong nung taoba Chief Secretary, Alemtemshi Jamir-i okila jembidang, 2011 census ajanga Nagaland nütsüng yongsük nung lanur shilem 40.17 lir.
Naga lanurtemi tarutsü tajung, aser pei sasa liteta aotsü jangrar. Naga lanurtemi sorkar aser loktiliba nung ochimashi aliba atema tebilemtsü abener. Ajisüaka, tanü Naga lanurtem tsüngda meputep adokbaji tebilemtsü ka lir aser asenoki Nagaland ji tamajung ta dang bilemra aser inyakyim aija dang lira, asenoki kecha metongtettsü, ta Alemtemshi-isa ashi.
Asenoki tajung bilemtsüla aser Naga loktiliba jungdaktsünüra, asenoki tamajung bilemba tangatetba agientsüla aser tangatetba tajung nung katika metongshiteptsüla, ta Alemtemshi-isa ayongzük.
Naga nungertemi akhi mapang nungi aliba tangatetba bener aliba ajanga tejakleni maoer aser terenlok mali. Anungji lanurtemi alizüng tasen ayutsüla, mangdang tasen aser Nagaland atema tarutsü tasen nükla nung yur wadang ajaklen terenlok angutsü aser tejakleni aotsü atema inyaktsüla, ta taoba Nagaland Chief Secretary-isa ayongzük.