Rio aser T. Khongo nati Wokshing Phom den asüku lemsatep

Dimapur, March 28 (TYO) : Tesüiba mapang chief Minister aser tang MP teinyakdak Neiphiu Rio-i, “Wokshing Phom mapang tatsüka shiranga aliba sülen Dimapur nung asüba osang angashia kü mulung kanga shiranger,” ta sangdong ka ajanga ashi.
Pa ya kanga dang bendanga agütsüba aser nendaka inyakba lenir ka liasü. Pai teti nüburtem asoshi bilema inyak, balakata sensakertem atema kanga bilemja inyakba nisung ka liasü. Pa taküm junga ali tepiyong pai nüburtem asoshi inyak aser pai yimjung aser terenlok atema nendaka inyak. Pai asen lokti asoshi mapa tajung jenti inyakogo aser pa asen mulung nung teti bilemtettsü, ta Rio-i ashi.
Pa asüba ya Naga lokti rangben aser balakata Phom kin asoshi kanga takoksa tulu lir. Pa asübaji asen nem shisa agütsür tebu-tedi tajung ka asen dang nungi pilar aoer asütsü, ta Rio-i ashi.
Ni asür kibong den asüku lemsateper aser asür tanela teti anisüngzükdak yujangma ta sarasademtsür.
Ano sangdong tanga ka nung tesüiba mapang Ex-Parliamentarian Association nung Tir, T. Khongo-i, Bura Namsang Yim nungi asür Nyapong Phom’er jabaso Ex-MLA, Wokshing Phom Zion Hospital, Dimapur nung mapang tatsüka shiranga amungba sülen March 26, 2017 nü asüba osang angashia kanga aoksa, ta sangdong ka ajanga ashi.
Pai, asür Wokshing Phom ya 1974 küm Tamlu Assembly Constituency nungi Nagaland Legislative Assembly election nung adok. Pai nüburtem kanga bendanga agüja tenzük, ta sangdong nungji shia lir.
Ex-Parliamentarian Association tenüng nung ni asür kinungertem den asüku lemsateper. Asür tanela teti anisüngzükdak yujangma