Rio aser Zeliang na NPF telok nung manioktsü: Dr Liezietsu

Kohima, August 31 (TYO): Taoba Chief Minister aser tang Naga People’s Front (NPF) Tir, Dr. Shürhozelie Liezietsu-i pa leniba anemer NPF MLA 36 pronglaji joko NPF telok nung meyipa magizüktsü, ta metetdaktsüogo. Tang parnokji kar aridokogo aser kar suspend süja lir ta paisa ashi.
“Tang Lok Sabha MP, Neiphiu Rio-i anir NPF telok balaka tenteter state nung yimsü süa aliba telok dang party-i meyipa arung ta mashitsü,” ta Dr Liezietsu-isa tanü Brehostibarnü NPF Kohima Division lokti senden ka nung jembidang metetdaktsü.
Joko, state general election agitsüba mapang atonger asünungji, NPF telok anema apusortem rongnung peisasa meyipa arura agizüktsü saka joko parnok dang meyipa arung tabo majatsü, ta NPF tir-isa metetdaktsü. Taruba 2018 election nungbo NPF ticket ya lanurtem nem dang agütsütsü, ta paisa ashi.
Tang NPF telok nung atalokba ya tanga kecha masü saka 2015 küm atalokba kasa ataloker, iba mapang nunga tang amai NPF MLA-tem teimbaka Sovima nung jenoka yur anogo 116 NPF telok anema inyaka among saka takok mengutet, ta Dr.Shurhozelie-isa metetdaktsü.
Iba mapang NPF telok nung timtem agütsür purtemi tang amai parnoksasa NPF tir den mendenpurtem shimer mapa tenzüka ooya liasü. Iba mapang parnoki NPF telok tashiyim aser sen agi rakzüktsü merang saka tamakok angu. Iba sülena kasa teloki antepong noksa ya mamshidaktsütsü atema Election Commission of India nem ken o agütsü, saka parnoki makok ta paisa ashi.
Tang parnoki NPF telok tenüng amer inyakba ya nübortem mangmangdaktsütsü asoshi inyaker, anungji nübortem memangmangtsüla, ta paisa ashi.
NPF telok nung tang MLA-tem ishiba dena liaka, party-bo onok den lir, yimsüsür tatartemji party meyong saka party ya tatar yimsüsürtem meyong masü ta NPF tir-isa metetdaktsü.
NPF telok ya Naga yimten tebilemtsü timi telatetba kati arudaktsütsü merangtsü aser Naga nunger asoshi tajung inyaktsü atema tentet, anungji iba telok ta tashiyim aser sen dak dang temulung alemer ket nungbo magütsütsü ta paisa ashi.
Taoba July ita nung pai aniba government anentsüba indang ashidang, “item ajungaji Governor PB Acharya-i Nagaland nung Regional Party loksadaktsür BJP government arutsü atema jelia inyakba mapatem liasü,” ta Dr. Shurhozelie-isa ashi.
Paisa ashiba agi, linük temzüng 10th Schedule nung party Whip yabo political party-i dang shimer saka yimsüsürtemi meshimer. Ibaji meteta tatar senden nung Speaker-i ochi obendang agütsütsü melena ozüng alema Nagaland speaker-i inyakogo.
“Party anema inyaker MLA-temi T.R Zeliang parnok Whip asütsü shimbaji okadak kecha nunga magizüktsü, anungji yakta ochi obendang angutsü,” ta NPF tirisa metetdaktsü.
Iba kasa senden nung DAN mendenbuba, Kuzholuzo Nienu, MLA-i jembidang, “NPF tir shitakbaji Dr. Shürhozelie lir ta alima ajaki meteta lir, yakta ochi obendang angutsü,” ta metetdaktsü.
Iba senden nung Ex-Speaker Thenucho Tunyi aser NPF spokesperson, Achumbemo Kikon natia jembia liasü.
Tanü iba senden nung NPF teloki Nagaland governori linük temzüng ozüng nung aliba ama mesüi artitepa NPF teloki aniba government anentsüba atema taitsüba osang ka metetdaktsüogo.
Tatem tashi NPF telokbo Dr Shurhozelie Liezietsu leniba nungsa aotsü, ta parnokisa metetdaktsü.