Rio aser Zeliang nati asür K. Yamakam mang ayimer

Dimapur, Yimpoksüi (November) 9 (TYO): Taoba Minister aser pezüben tashi 4 MLA K. Yamakam asüba osang angashia temulung raksar ta Chief Minister Neiphiu Rio-i metetdaktsü.
Asür Yamakam ya SCERT, IPR & Village Guards Advisor, Toshi Wungtung tebu lir.
1950s nung asür Yamakam-i Sangphur Students Union tentet aser paisa Yimchunger community nung Executive Member, Yimchunger Tribal Council (YTC) aser Advisor, YTC mapa balala inyak.
Pa ya Dobashi ka liasü aser 1970s nung Head Dobashi aküm. 1989 nungi 2003 tashi pa pezüben tashi election nung takok angu aser Minister of State for Soil & Water Conservation, Sericulture (1993) aser Minister for Horticulture, Sericulture, Relief and Rehabilitation (1998) inyak.
“Nagaland Legislative Assembly nung ni asür Yamakam den külemi inyaksemtsüsa maongka angu. Pa ya nübortem atema kanga aria bilemtsüba lennir ka liasü. Pa ya nisungtemi kanga akhümtsübuba lennir ka liasü kechiyong pa teindang aser bendanga agüja inyakba lennir ka liasü” ta Rio-isa ashi.
Nagaland sorkar tenüng nung, NDPP aser kü tenüng nung ni tasür kibong den asükhu lemsateper aser tasür tanüla teti anisüngzük ngudakjang ta sarasadetsür ta Chief Minister-isa ashi.
Maneni, Nagaland Assembly nung opposition lennir T.R Zeliang-isa K. Yamakam Yimchunger asüba atema temulung raksaba osang metetdaktsü.
IP&R, SCERT and V.Gs Advisor Toshi Wongtung tebu tanü Zion Hospital, Dimapur nung asüba osang angashia temulung raksar ta T.R Zeliang-i ashi.
Asür K. Yamakam Yimchunger ya Tuensang District kübok Sangphur yimer liasü aser pa Head Dobashi inyakba den 58 Shamator-Chessore Assembly Constituency nungi pezüben tashi Nagaland Legislative Assembly nung züngsem liasü, ta paisa metetdaktsü.
Pa asübaji Yimchunger nunger atema dang masü saka Naga nunger ajak takoksa ulura lir. Iba mangyim tejashi mapang ni aser ozü kibongi asükhu lemsateper aser Tsüngremi tasür kinungertem sünepjang aser tanüla teti anisüngzük ngudakjang ta sarasademer, ta T.R Zeliang-isa ashi.