Rio Games milen April 21, 2016 nü Olympia nung tsüloktsü

Kuala Lumpur, August 01 (Agencies): Rio de Janeiro Olympics milen Greece kübok Olympia nung April 21, 2016 nü tsükloker anogo 12 lir külen South America nung tentetba Brazil linük-i bener aotsü sentong renemogo ta asayamong tayongeri tanü Honibar nü metetdaktsüogo.
“Olympics milen sangküm May 3 nü Brazil tonga bener aoba sülen anogo 100 agia Brazil nunger asayartemi par linük lunga bener asemtsü,” ta Rio 2016 communications director, Mario Andrada-i osang jangjashitsü.
Summer Olympics ayonger mezüngbuba South America nung tentetba yimti küma, Rio-i terenemshiba tulu agia alidang, par milen abener 12,000-i Brazil kübok tentetba yimti aser yimtsüng 500 shi ajanga milenji bener asemtsü sentong tulu yur külen Rio Olympics tayongertemi Olympics milen taoba July ita tetenzüklen saya liasü.
Olympics tenzükdak, Olympia nung sentong tajung ka agia summer aser winter Olympics naprongla indang milenji aina ajanga anü tashi amshia mezüng tsüklokba sülen mezüngbuba milen abeneri milenji bener asemtsü tenzüker.
Tesüiba mapang ayongba Olympics asayamong nungbo milen tsüklokba sentong ya magi saka 1936 Berlin Olympics nungi tenzüka Olympics asayamong den sentaktepa milen tsüklokba sentong ya agia arur.