Rio-i aniba PDA sorkari Naga nunger anisar: NPF

BJP-i politics den tamangba yimsü dak sendakba külemküjatem memeyokteptsüla

Kohima, Luroi (August) 27 (TYO): Nagaland nung opposition Naga People’s Front (NPF)-i tanü Chief Minister Neiphiu Rio-i aniba PDA sorkar aitsü.
PDA sorkari Independence Day onük ajanga nübortemi mashileni anisaba aser State BJP lennirtemi taoba Prime Minister asür Atal Bihari Vajpayee indang aut Nagaland ayong nung enoktsü bener aruba ajanga nübortem temulung yirutsüba atema NPF-i aitsü.
Tanü NPF Headquarters nung party press secretary Atou Liezietsu lia NPF Spokesperson Achumbemo Kikon-i iba onük jembi.
I-Day onük nung PDA sorkari VIP sobaliba agien ta jembiba atema Kikon-i ashiba agi “iba ya o agi jembiba dang ashi mapa agibo meinyak kechiyong parnoki government undertakings balala nung backdoor appointment ajanga Chairman tem shim aser sorkar ketdangsübaren nung ochishiba aser tai melii inyakba kecha mali.”
Anogo 60 tsüngda gari lenmangtem yanglutsü ta PDA sorkari nangzük saka anogo 173 süiaka gari lenmang tia tajungba akümba kecha majiteter, ta paisa ashi.
PDA sorkari ketdangsübaren junga inyaker ta ashir saka tesüiba ita trok tsüngda kaketshirtemi scholarship meshiba, ILP mapa inyaktsüba, ali atsünga aliba ken o aser tesayurtemi lungkak aitba sentong balala agiyonga arur.
Nagaland nung law & order tajungba kümogo ta PDA sorkari ashir saka ibaji tiyazü lir kechiyong tang tesüsabuba atalokba, Four Lane Kohima-Dimapur road nung mapa inyakertem pur aoba ajanga iba kuliji agütsür. Kohima aser Dimapur nung alirtem dena lendong nung jenbua mali nung kodaser meta talang pilar aliba district tem nung security tajung asütsü, ta Kikon-isa ashi.
Taoba sorkari 2014-15, 2015-16 aser 2017-18 indang VDB grant-in-aid magütsü ta Chief Minister Rio-i ashibaji tiyazü ta pai shisem.
Taoba Chief Minister T R Zeliang-i anir NPF sorkari Niti Aayog den ajurutepa mepishi aser Commission-i November 8, 2017 nü Nagaland sorkar nem sen crore 185.09 agütsü.
NPF sorkari sen den Assembly Constituency 60 prongla nem tractor lema agütsütsü atema mapa teinyakdak lia Election Commission of India-i state Assembly election agitsü osang metetdaktsü aser Model Code of Conduct tenzükba ajanga sorkari sen magütsütet, ta NPF otongdari ashi
PDA sorkar akümba sülen ang senji alem saka ibaji taoba NPF sorkari inyakba ajanga anguba liasü. Anungji PDA sorkari iba atema tenüng magitsüla.
Tzümetsüng agi kongshiba Kerala state nung timtem ajuruba atema NPF-i aria bilemtsür aser Nagaland sorkari teyari agütsüba atema pelar. Ajisüaka, Nagaland ajungalen aser talisa Kiphire district nung nübortemi timtem ajuruba atema khuret abener. Shitakba agibo state sorkari lenmangtem nung gari senzütsü atema lapoktsütsüla aser timtemer nem tang nüngdakba achiajemtsü aser osettem tongtsütsüla, NPF-i Nagaland nung timtemertem yaritsü atema mapa inyakdar, ta paisa ashi.
State BJP-i Nagaland ayongtem nung enoktsü atema taoba Prime Minister asür Atal Bihari Vajpayee indang aut bener aruba atema Kikon-i “Vajpayee ya ajaki metetba lennir ka liasü aser par party-i dang masü saka ajaki akhümtsübuba aser saklokba nisung ka lir. Anungji asenok ajaki pa nem tetushi agütsütsü tim” ta ashi.
NPF-i asür Vajpayee den tesentaktep tajung liasü aser pai Naga sobaliba khenyongi balaka ta agizük aser Nagaland state nung terenlok mapa inyaktsü atema sen lemzüktsü. “Naga nunger ajaki pa dang kanga pelar, saka BJP-i Nagaland nung asür Vajpayee dak sendakba mapa inyakba atema sasa bilemtsür. Naga nungeri melamela temulung yirur aser asen nübortem tebilemba akhümtsübutsüla” ta Kikon-isa ashi.
BJP ya national political party ka lir anungji parnok politics den tamangba yimsü dak sendakba külemküjatem memeyokteptsüla. Tang Nagaland nung aliba BJP lennirtemi linük dang Naga nunger tenüng menüktsüogo, ta
“Asen state nung BJP lennirtemi inyakba atema Naga nungeri jashitsü tim nung jashir. BJP lennirtemi nübortem tebilemba aser tangatetba jungjunga shisadangtsüba liasü aser ano Tsüngrem ain adoktsü tsübua inyaktsüba liasü” ta
Taoba Prime Minister Vajpayee nem tetushi agüja state sorkari anogo tenet nü mangyimtsü sangdongogo aser ibaji teperi. Nagaland ya secular state ka lir aser iba jagi non-Naga nungertemi parnok indang benjungbentsü amungba nung tenokdangba kecha magütsür. Ajisüaka, BJP Nagaland unit-i asür Vajpayee aut bener arua enoktsüba mapa ya meinyak tajungba süla, ta Kikon-isa shisem.