Rio-i Assam-Nagaland arrtsülen alirtem ayongzük

Nagaland nungi Lok Sabha MP, Neiphiu Rio-i Nagaland-Assam Friendship meet nung jembiba angur. Noksa nungsa Assam MP Gaurav Gogoi-a angur.

Dimapur, November 02 (TYO): Assam kübok Mariani nung Nagaland-Assam Friendship meet alidang Nagaland nungi Lok Sabha MP Neiphiu Rio tongti tesemdanger liasü.
Iba sentong nungsa Assam Lok Sabha MP Gaurav Gogoi tetushi süa jaoker ama shilem agi.
Iba sentong amungba nüngtem nung Nagaland Police aser Assam Police tsüngda football asaya aser sobaliba sentong ka agia liasü.
Nagaland MP Rio-i o jembidang, arrtsülen alirtem tsüngda tesentaktep tajung ayutsü ayongzük.
Alemli mapang nungi Naga aser Assam nunger kidanger süa liyonga aru aser maneni yamaji liyonga aotsü. Anungji state ana tsüngda tesentaktep tajung alitsüla aser tangatettep ayutsüla, ta paisa ashi.
Rio-isa ashiba agi, state ana tsüngda arrtsü mangatetep ken o okadak benoka lir aser iba asoshi sasa bilemer saka iba obendang anguba ajanga asen angatetteptsü imlar.
Sentong nung tetushi süa jaoker Gaurav Gogoi-ia arrtsülen alirtem yimjung aser tesünep nung alitsü ayongzük.
Paisa iba sentong ayonger nem tenüngsang agütsü aser ibala sentong ajanga nübortem tali longjemdaktsütsü imlar ta shisem.
Ano, tanga sangdong ka nung Neiphiu Rio-i November 3, 2015 nü Saandsad Adarsh Gram Yojana (SAGY) kübok Longwa village adopt asütsü ta metetdaktsü.
SAGY scheme ya India Prime Minister-i tenzüktsüba sentong ka lir aser Rio-i iba scheme kübok Longwa yimtsüng adopt asüba sülen yimertem den sensaksem mapang ka alitsü, ta sangdong nungsa shia lir.