Rio-i asür Mrs. Longkei Phom mang ayimer

Dimapur, Luroi (August) 20 (TYO): Wb. Sochet Phom kinungtsü aser Health & Family Welfare Minister S. Pangnyu Phom tetsü Mrs. Longkei Phom tanü Dimapur nung asüba osang angashia jashir, ta Chief Minister Neiphiu Rio-i metetdaktsü.
Asür Mrs. Longkei Phom ya 1925 nung aso aser Yachem yimtsüng nungi Khristan yimsü mezüng agizükertem rongnung la ka liasü. La ya yimtsüng nung mezüngbuba pastor kinungtsü ka ama lar chirnurtem dang masü saka yimtsüng aser tangalen alirtem aika anitet, ta Rio-i sangdong ka nung ashi.
La ya Tsüngrem akhümtsübuba tetsü ka liasü aser lai lokti asoshi mapa tajung inyaktsüba kuliji lar chirnurtem, la temang anema aliba aser arishia aliba ajanga kuli sayur. Lai la kinungbo, jabaso 5, jala 1 aser mezüng semchir 26 aser tanabuba semchir 12 yutsür alima nungi pilaogo, ta Rio-isa shisem.
Iba mangyimba mapang Nagaland sorkar tenüng nung aser ozü kibong tenüng nung asükhu lemsateper. Tsüngrem taochi nung nenoki tashi aser tesünep angutsü atema onoki sarasademtsür, ta Neiphiu Rio-isa ashi.