Rio-i Dimapur nung saisapong benjung lapoktsütsü

Dimapur, April 29 (TYO) : Dimapur nung tan mezüngsüa saisapong benjung ka, “Victor 1st North-East Masters (Veteran) badminton championship” May 4 nungi 6, 2017 tashi Badminton Indoor stadium, United colony (Nagaran), Dimapur nung asayatsü.
Asemnü munga asayatsü aliba asayamung ya Nagaland Badminton Association kübok Dimapur District Badminton Association (DDBA)-i ayongtsü aser iba asayamung ya tesüiba mapang Nagaland Chief Minister aser tang Nagaland Lok Sabha, MP, Neiphiu Rio-i anepdang 9:00 ako nung lapoktsütsü.
Iba asayamung mapang stall balala lapoktsü aser item rongnung chiyongtsü tapu balala anguba stall den, art, holiday & leisure aser saisapong packages tem angutsü.
Iba den külemi nikongdang shia kentener telok balalai ken atentsü aser item rongnung DGP telok, DDBA telok, Renbeni Odyuo aser Sinya Kath nunger den asaya menür Hopong Phom nunger densema lir.
Tan mezüngsüa Dimapur nung iba asayamung tulu aser kenten benjung repa amunga sentong nung nübur ajaki mepaitoki arua reprangtsü ayongzüker.
Ano jangratemtsü balaka kaji iba asayamung tatembangnü Arjuna award angusang aser international badminton asayar, Victor atema brand ambassador, Ashwini Ponnappa arutsü.
Iba sentong tulu ayongertemi ashiba agi, tan iba asayamung nung Nagaland dena north east state tem nungi badminton asayar nisung 100 dak temai tokteptsü osang jangjaogo.
Iba asayamung nung senpet ajak senteper sen lakh 2.66 agütsütsü aser iba sen rangben den gift hamper temji Victor-i agütsütsü.
Badminton Association of India (BAI) Tir aer Minister of Finance, Health & Education, Govt of Assam, Dr. Himanta Biswas Sarma aser Nagaland Badminton Association (NBA) Tir aser Minister Roads & Bridges, Govt of Nagaland, Y. Vikheho Swu na iba asayamung shibangba sentong nung Tongti tesemdanger aser tetushi tejaoker alitsü.
Iba asayamung ya badminton ajanga Northeast state tem tsüngda temba akangshitsü nükjidong nung ayonger, ta asayamung ayongertemi ashi.