Rio-i Diphupar Naga Youth Organisation nem tenüngsang agütsü

Dimapur, October 21 (TYO): Diphupar Naga Youth Organisation (DNYO) küm 50 ajungba benjungmung tanünübuba nung Nagaland nungi Lok Sabha, Neiphiu Rio-i tongti tesemdanger ama shilem agi.
October 21, 2017 nü Local Ground, Diphupar nung ayonga agiba sentong nung Neiphiu Rio-i DNYO nem tenüngsang agüja jembidang, DNYO-i Diphupar Village ajungketba aser kümzüka ayuba mapa inyakba den Diphupar Village nung loktiliba ajungkettsü atema mapa jenti inyaka arur, ta ashi.
Hon jubileemungji küm 50 nung inyaktetbatem aser tamakok angubatem meyipa reprangshiba mapang la lir. Asenok tejakleni aotsü atema iba benjungmung ya asenok kati ajungmesoteptsüba mapang ka lir, ta paisa ashi.
Diphupar ya mini Nagaland ka lir aser iba yimtsüng nung kin 16 den tanga kintem temeyoktep alir. Iba ama yimtsüng ka longjema aliba aser Naga nunger sobaliba ajungketba atema kanga nüma tanga bilemer, ta Rio-isa shisem.
“Naga nunger tanü azüngtsü-zülutsü metetba jenjang noklang nung shilem 80 dak tali lir saka asenoki aika mangazük lir. Linük meimba, ozüng tsübuba, taintem akhümtsübuba, shisa akaba, sobaliba metetba ajanga nisung ka taküm aser libaliro jungdaktsütsü aser ibaji ajanga loktiliba tajungba akümtsü,” ta Lok Sabha MP-isa ashi.
“Asenoki leptep-tsüngtepba putu toktsür mapang talangka aruogo saka asenok Naga nunger ano shisatsü nung maien aser shisa kaa meliteter. Asenok longjemra aser kati ka putepa alitsüla ta angatet nungdang asenoki asen tarutsü tajungba yangertettsü” ta paisa shisem.
Iba benjung tenüng nung Director, Postal Services Nagaland-ia special cover ka sayatsü.
Tanü agiba sentong nung MLA Kuzholuzo Nienu medentet saka pai yokba jubilee salem osang zünga metetdaktsü.
Sentong nung Diphupar Village Council Chairman, Lanutoshi Pongen aser Naga Students Federation vice president nati o tatsütsü jembi, Lotha Youth Organisation aser Jubilee Choir temi ken aten aser Eastern Naga People Union Diphupar Area, Youth Organisation Diphupar, Tangkhul youth Organisation, Diphupar, Rongmei youth Organisation Diphupar temi sobaliba shilemtem agia liasü.
Tanü sentong nung adenertem rongnung Advisor DUDA, Pangyu Phom, MLA, C.M. Chang, Parliamentary Secretary tem- Dr.Longri aser Namri Chang nungertem liasü.