Rio-i floor test nung takok angu; Vikho-o Yhoshü Speaker inyaktsü shim

Kohima, Metsüremi (March) 13 (TYO): Nagaland nung Neiphiu Rio-i aniba People’s Democratic Alliance (PDA) sorkari floor test takok nguogo.
Rio-i Metsüremi (March) 4 nü MLA 32 anir Governor dang sorkar akümtsü temelaba meshi aser Metsüremi 6 nü pa Chief Minister inyaktsü shim aser Metsüremi 8 nü sorkar tasen tenangzükba agia liasü.
PDA sorkar nung aliba MLA 32 rongnung Nationalist Democratic Progressive Party (NDPP) nungi 18, BJP nungi 12 aser JD(U) aser Independent ka ka lir. Ajisüaka, sorkar tasen akümba sülen National People’s Party (NPP) nungia MLA ana parnok den züklok.
Iba mapang Governor-i Rio dang Metsüremi 16 nü mesüra matongdang pa ket nung nübo peria aliba kuli sayutsü tetuyuba agütsü.
Züngsem 60 agi akümba Assembly nung Rio-i benokba confidence motion pusema vote 33 liasü aser 26-i anema agütsü. Speaker dak alia züngsem 59 pronglai vote agütsütsü atema register nung sign asü.
MLA 33-i Rio sorkar pusema vote agütsü aser parnok rongnung NDPP nungi 17, BJP nungi 12, NPD nungi 2, JD(U) MLA ka aser Independent MLA ka liasü. Rio anema vote agütsür ajakji Naga People’s Front (NPF) nungi MLA tem liasü.
Ano külen, tanü NDPP-i aniba PDA candidate Vikho-o Yhoshü-i State Assembly nung Speaker inyaktsü atema takok angu.
Pa ya 2008 nungi kümsük tasembuba atema Southern Angami-I constituency nungi MLA lir.
Speaker indang election ji secret ballot ka ajanga agi aser iba nung PDA MLA 33-i Vikho-o Yhoshü aser NPF MLA 26-i taoba speaker Dr Imtiwapang Aier nem vote agütsü.
Chief Minister Neiphiu Rio-i Speaker tasen nem tenüngsang agüja jembidang, Yhoshü ya ‘refined gentleman’ ka lir aser pai tebendang kecha melii assembly len anir aotsü imlar ta ashi.
Pai sorkar aser public maparen nung aika ajangshia aruogo aser pai len aniba ajanga nisung ajak ajangzüktsü. Züngsem ajaki assembly tiptema odaktsütsü atema pa den yariteptsü mepishir, ta Rio-isa ashi.
NPF Legislature Party lennir aser taoba Chief Minister, T. R Zeliang-i Speaker nem tenüngsang agüja jembidang, treasury aser opposition bench nung aliba MLA ajaki Speaker-i shinga tsütsü meshii aser telemsa meyui assembly ketdangsüa aotsü imlar ta ashi.
Speaker Vikho-o-i mapa tasen agizüka o jembidang, pa nem vote agütsüba atema pelaba metetdaktsü aser züngsem ajak dang tiyongtsü nung mapa inyaka aotsü merangtsü ta nangzük.
Speaker-isa Rio ket nung nübo peria lir ta sangoktsüba sülen Metsüremi (March) 22 anepdang 9:30 tashi assembly anisüngzüka atatsü ta osang metetdaktsü.
Tanep protem speaker aser BJP MLA Mmhonlumo-i züngsem tasen ajak tenangzükba agidaktsü aser pa ketdangsüba nung Speaker indang election agia liasü.