Rio-i “Framework Agreement” mapa akümtsü nangzük

Dimapur, May 24 (TYO) : Naga nunger asoshi tongtibangtibaji Naga yimten tebilemtsü latettsüba ya lir, anungji Naga nunger ajaki aser talisa lanurtemi “Framework Agreement” ya mapa küma inyaktsü asoshi nungittsüla, iba ‘agreement’ ya mapa akümtsüsa inyaktsü, kechiyong iba yagi Naga nunger ajangzüktsü ta Lok sabha MP Wb.Neiphiu Rio-i metetdaktsü.

Tanü Mongolbar nü pa Delhi nungi arudang pa pu asemer noklang aika Dimapur nung tayimtsü  anendak kima sentepa alidak jembidang pai iba o ya metetdaktsü.

“Tatalokba otsütem ya asenok asoshi tongtibang saka ano asenok asoshi tarutsü anogotemang tongtibangtiba lir, ” ta paisa ashi.

NPF teloki pa “suspend” sütsüba sülen pa tanü mezüng Nagaland-i aruba mapang pa pu asemertem adenshia pa agizüka liasü.  Iba mapang pai parnok den jembidang, pai ochi jembitsü aser shitak inyaktsü metsübur ta metetdaktsü.

“Kechiba suspend sütsü ?  Ochi jembia shitak inyakba agi asü ? Onoki onok ajungtsü asoshi masü saka Naga nunger atema inyaker, anungji kecha metsübur, kechiyong Tsüngrem aser Naga nungertem onok den lir,” ta Rio-isa metetdaktsü.

Paisa ashiba agi, pai chief minister menden toktsüba mapang, parnok rongnung shisalemsateptsü melen NPF lenirtemi miima T.R.Zeliang shimtsü asoshi sign südaktsüyonga ao, ajisüaka paia T.R.Zeliang dak tamang kateta pa melen shim. Ajisüaka, mapang tatsüka lir külen NCP MLA asem BJP nung adenba ajanga timtem adok, kechiyong par asemji Speaker-i disqualify sütsü.

“Ni masü parnok jagi tama anema apuso aser iba nung jagi tenzüka NPF MLA-tem teimbakati T.R.Zeliang maginüi aküm. Iba osangji kü dangi  NPF MLA Kaito Aye-i bener aru. Iba mapang tepiyong nibo tatar teimbai mulungba nung aotsüla ta nokdak, iba jagi tanga NPF teloki ni aitsütsü tenzük,” ta Rio-i pa temeten nübortem nem metetdaktsü.

Rio-isa ashiba agi, pai  NPF purtem rongnung putepshia alitsü atema senden ka alitsü asoshi August 22, 2015 anogo nung taoba Rajya Sabha MP, Khekiho tenati NPF tir, Dr. Shurhozelie dangi zülu.Ano, iba sülen kasa tejangraba aser taginüba shia NPF tir dangisa  January 26, 2016 anogo nung zülu saka NPF tiri ibaji agizüka kecha meinyak ser anogo ter tsüngda osangkaket ajanga ‘Show Cause Notice” dang anaben agütsü ta  Rio-isa metetdaktsü.

Tanü iba senden nung taoba Home minister aser tang NPF nungi suspend sütsür aliba MLA, Wb.Imkong L Imchen, taoba speaker aser Home minister, Thenucho; Independent MLA, Thomas Ngullie; NPF Manipur unit nungi, A Abongmei, aser taoba ENSF president, YP Chilio nungertemia Rio pu sema jembia liasü.