Rio-i jembiba o ajanga Naga nunger aoksadaktsüogo: NPF

Kohima, Aami/June 14 (TYO): Naga integration aser Citizenship Amendment Bill 2016 onük nung PDA Chief Minister, Neiphiu Rio-i jembiba tashishitsü oji Naga People’s Front-i tim nungdang aitsüogo, ta tanü Press Bureau, Naga People’s Front, Central Headquarter, Kohima, Nagaland-i sangdong ka nung metetdaktsü.
“Rio-i Naga nunger litsü ajak longjemtsüji tamakoktsü ta jembiba oji ajanga Naga nunger ajak aoksadaktsüogo, kechiyong pa tang teinyakdak Chief Minister lir,” ta sangdong nung shia lir.
“Neiphiu Rio-i 2002 küm NPCC-i adokba “Bedrock of Naga Society” kaket anema Congress Ministry nungi anen, aser iba mapang nungji Naga nungeri Rio tangatetba tajung pelaa agizük, iba sülen 2003 küm pai takok ngua liasü,” ta sangdong nung shia lir.
“Neiphiu Rio ya tesüiba küm 15 tashi NPF aser NPF sorkar nung dena liasü. Iba mapang nungji NPF lenir ka ama Rio-i Naga nunger litsü ajak longjemtsüji Naga nunger temeden lir, aser iba nungji atsü-anem kecha malitsü ta jembia liasü. Ajisüaka Rio-i kenüyongi yimtenren nung pa tangatetba melenshibaji ajanga NPF süngmanger,” ta NPF sangdong nung shia lir.
Naga nunger aliba tesem ajak longjemtsüji 16th Point Agreement para (13) aser Constitution of India Article 371 (A) Clause-IV aser 16th Point Agreement Clause 13 nung kanga tongtibang onük ka lir. Naga People Convention (NPC)-i Naga nunger aliba tesem ajak longjemtsü atema akhanger, ta sangdong nung shia lir.
Tamasabo Rio-i Naga nunger aliba tesem ajak longjemtsüji Naga nunger temeden lir ta jembia liasü, ajisüaka pa menden ajangzüktsü atema Naga nunger takoksa ngudakja yimtenren nung pa tangatetba khenyongi melenshiogo, ta NPF sangdong nung shia lir.
“NPF tentetba mapang nungi Naga nungeri yimsüsüba ka kübok linüba atema NPF-i jembir aser tesüiba küm 15 tsüngda NPF sorkari Assembly nung Naga nunger aliba tesemtem longjemtsü nungita ponguben tashi bangzüngogo. Ajisüaka tang Nagaland Chief Minister teinyakdak Rio-i tawa Naga nunger aliba tesem longjemtsüji tamakoktsü, ta jembibaji Naga nunger atema takoksa tulu, talisa Naga yimtenren ken o jembiba tongtibang tensa ka nung pai iba o jembiba ajanga aoksar,” ta NPF sangdong nung shia lir.
“Ano külen Chief Minister-i pai Citizenship Amendment Bill 2016 pusemer, ta yimjak nung sangdongba ajanga NPF aoksar. Rio-i, Arrla 371(A) kübok Naga nunger kümzüka alitsüsa peria inyaker ta jembiogo. Anungji pai aniba PDA sorkari iba Bill anema menokdaktsü. Atangji iba Bill yimjak nung pusemer Chief Minister rongnung pa ka lir,” ta sangdong nung shia lir.
“Naga nungeri Inner Line Permit (ILP) junga benoka inyaktsü aser Dimapur densema state tesem ajungalen ILP benoktsü atema ola adoker ta NPF-i nenshia metetdaktsür. ILP aser Arrla 371 (A) liaka ozüng alema bendangertem arua aliba state tamajungbaji Nagaland kümogo. Rio-i iba Bill pusemba ajanga Naga nunger tarutsü tia raksatsütsü,” ta NPF sangdong ajangasa metetdaktsü.
“Rio-i BJP dang tashi angaa parnok melung achitsü atema inyakbaji Naga nunger tarutsü tia raksaja Chief Minister menden kümzüka pa nija ajangzüktsü atema lir ta NPF-i angateta lir. Ajisüaka NPF-i pei lima meima Naga nunger nungittsü, talisa Naga nunger tarutsü tia kümzüka ayutsü atema item tongtibang onük ana pusemtsü,” ta NPF-isa metetdaktsü.
Item kuli ajungaji asadanger, Neiphiu Rio kübok Naga nunger kümzüka mali ta NPF-i reprangteter, ta kasa sangdong ajangasa metetdaktsü.