Rio-i NAYO 25 jubilee nüngshilung sayatsü

Dimapur, Luchii (December) 5 (TYO): Northern Angami Youth Organisation (NAYO)-i 19 buba Hornbill Festival den külemi küm 25 ajungba jubilee den lung atsüba benjung amung.
December 5, 2018 nü Northern Angami Centre, Chiephobozou nung parnoki benjung amungdang Nagaland Chief Minister Neiphiu Rio-i Chief Host aser MLA Khriehu Liezietsu-i Co-Host ama shilem agi.
Sentong nung Neiphiu Rio-i NAYO tenzükertem dang pelaba metetdaktsü. “Lanurtem ya loktiliba nung tongtiret lir aser lanurtem longjema lira, loktiliba nung telongjem alitsü” ta pai ashi.
Paisa lanurtem dang alizüng tajung ayutsü aser longjemtsü ayongzük. “Naga loktiliba nung tema aser telungpur telok aika lemsa lir. Anungji lanurtemi pei sasep nung dang masü saka loktiliba nung telongjem adokdaktsütsüla,” ta Rio-i ayongzük.
Hornbill Festival den külemi lung atsüba sentong ayongba ya telongjem aser tangatettep aliba kuli lir. Lanurtemi tangatetba tajung alitsüla aser kati ka den tangatetba tajung nung liyonga aotsüla. Asenoki asen ali rongsen aser sobaliba wazüka ayutsüla aser tarutsü tia tajung yangertsüla, ta paisa ashi.
MLA aser Co-Host, Khriehu Liezietsu-ia o jembidang, NAYO tetenzükertem dang pelaba metetdaktsü.
Jubilee ya tesüibatem bilemtetba mapang ka lir aser ano aibelentem metongshiba mapang ka. Jubilee ya tatok agütsütepba mapang ka aser tarutsü dak ranglokba mapang ka lir, ta Khriehu-isa ashi.
Tanü sentong nung mendenji Vice President, NAYO, Rukravolie Rulho liasü, Chief Minister Neiphiu Rio-i nüngshilung sayatsü aser Ebenezer Baptist Church, Kohima Pastor, Rev. Keviyiekielie Linyu-i temoatsü meshia sarasadem.
Lung atsüba sentong nung Organising Committee Member, Kekhrievolie Keyho menden liasü aser Baptist Church Chiechama, Pastor, Rev. Sonei-u Metha-i temoatsü meshia sarasadem.