Rio indang ken o atema Police-i charge sheet ka benok

Kohima, July 10 (TYO) : MP Neiphiu Rio-i taila kulikaket amshiba atema S. Shingnyu aser Hanghu nati FIR benokba sülen bushisüngdanga arur Kohima Police-i charge-sheet ka süogo.
Police-i charge sheet ji Chief Judicial Magistrate indang okadak agütsüogo ta osang angazüker.
Nagaland MP, Rio-i taoba Lok Sabha election nung taila tazüngba kulikaket agütsüba anema Chief Judicial Magistrate (CJM), Kohima indang okadak nung ken o ka benok. May 9, 2014 nü agiba Lok Sabha election nung Rio-i pa indang educational qualification ji “BA Pol. Science Honours” ta agütsü, ajisüaka shitakba nungbo pa BA simple pass dang lir.
October 9, 2015 nü Rio-i Chief Electoral Officer, Nagaland dang pai 2014 nung nomination papers agütsüdang educational qualification enoka aliba melenshitsü atema Chief Electoral Officer, Nagaland dang asüngdanga liasü aser iba ajanga ken o public domain nung aden.
Ajisüaka, CEO-i affidavit aser papers ajak Election Commission of India dangi yokogo anungji memelenshitettsü ta ashi.
March 31, 2016 nü CJM matsüngdang tang tesüsaba Criminal complaint ya benoka liasü aser iba mapang menuba atema Criminal Miscellaneous case densema benok.
Aiben Rio-i Condonation petition atema affidavit asütsü atema mapang meshisem saka tanü tashi iba indang affidavit ka danga agüja mali.
June 27 nü Misc Case on Condonation ken o angadangtsü atema anogo latet, ajisüaka Rio atema okatsüri District & Session Judge matsüngdang ken o belentsü atema application ka benoka lir aser okadaki tuyuba ama pa kinungtsü treatment agiba indang kulikakettem magütsüter ta shia okadak dang tatok meshia liasü.
Ajisüaka, okadaki District & Session Judge matsüngdang ken o benokba osang kecha mangazük, anungji ken o ji benoka angadangtsü ta lemtet. Iba sülen Rio’er okatsüri okadak anogo ka meshisem saka okadaki iba temepishibajia magizük.
Ken o benoker Rosemary Dzuvichu atema okatsürtemi agütsüba kulitem okadak benoka angadang saka iba mapang tai tonglokja alir (Rio) atema okatsüri metoktep aser July 8, 2016 nü angadangtsü atema anogo lateta liasü.
Rio atema okatsürtemi Session Court matsüngdang Judge ji NPCC President, K. Therie den tesentaktep lir anungji tashishi melii angadangtsü atema tanga Magistrate ka dangi belenang ta temepishiba agütsü.
District and Session Court-i June 27 nü CJM, Kohima indang okadak Criminal complainant ken o sota ayu aser iba ken o July 14, 2016 nü angadangtsü atema tetuyuba ka agütsü. Ajisüaka, Rio anema ken o benokertemi transfer petition aser District and Session Court-i ken o sota ayuba tetuyuba magizüktsü telemtetba agiogo.