Rio indang tazüngba kuli ken o angadangogo

Dimapur, May 26 (TYO): Taoba Nagaland chief minister aser tang teinyakdak Lok Sabha, MP, Neiphiu Rio indang tazüngba kuli dak sendakba ken o Hokolbarnü Chief Judicial Magistrate, Dimapur okadak benoka angadangogo.
Tanü Rio den par kinungertem aser pa pusemertem okadaki aru.
2014 Lok Sabha election nung tokteptsü atema tenüng agütsüdang Rio-i pa tazüngba kulikaket tai agütsü ta February 11, 2016 nü social activist kati Kohima chief judicial magistrate nung ken o benoka liasü.
Tanü okadak ken o angadangba sülen Rio atema okatsür Vitsorel Lcho-i osangbener den sensaksemdang, okadaki telok anaprong nungi ashiba onüktem angaogo aser obendang agütsütsü atema dang anünga lir, ta metetdaktsü.
Okadaki onok pusema obendang agütsütsü imlar, kechiyong ken o ji mapang süir ang okadak benok aser ozüng nunga aibelenba anogo nungi tenzüker küm ka tsüngda iba dak sendakba ken o benoktsü atema lateta lir. Rio indang ken o ji küm ana shi süir ang benok anungji, okadaki iba nungji ajemdaker onok metentsütsü imlar, ta Lcho-isa ashi.
Neiphiu Rio nem BA (honours) passed certificate ji aibelena agütsü ta college-ia kuli agütsüogo aser külen pai kecha tamajung mebilemi aser memeti kulikaketji amshi ta shiogo, ta okatsürisa shisem.
Tesüiba mapang college ketdangsertemi Rio nem educational certificate tai agütsüba indang osang metetdaktsüogo aser yimjak nung iba atema tadok meshiogo.