Rio medal agizüker nem Khel Ratna agütsütsü akok: Sports Ministry

New Delhi, May 24 (Agencies): Brazil kübok Rio de Janeiro nung taküm August ita 5 nü nungi tenzüka asayatsü ayongba Rio Olympics nung medal agizüker India asayartem nem Khel Ratna aser Arjuna Award agütsütsü akok ta India Sports Ministry-i metetdaktsüogo.

Olympic asayamong nung medal agizükertem nem tapet tetushi agütsütsü nükjidong nung Sports Ministry-i tan iba telemtetbaji agir lir.

Ministry-isa ashiba agi, Olympics nung medal agizüker asayartem nem küm 1 tashi matadaktsüi medal agizükba kümsa Khel Ratna aser Arjuna Award-ji agütsü renemogo.

Ano, taoba mapang individual shilem nung medal agizüker tanü tashi Rajiv Gandhi Khel Ratna magizüki alir asayartem nema India nung agütsüba saisapong sempet tematiba agütsütsü asoshi tenüng benoktsü telemtetba ka ministry-i agiogo.

“Rio Olympics 2016 nung team takokba angutsüsa tongti shilem agir asayartem aser taoba mapang Arjuna Award magizüki alir asayar tenüngtema kasa sempet agütsütsü atema tenüng benoktsü lemtetogo,” ta ministry-i osang jangjashitsü.

Taoba mapang, 2011 nungi tenzüka 2015 küm tashi nung saisapongtsü sabang nung takok tulu agizüker asayartem nema Khel Ratna aser Arjuna Awards agütsütsü asoshi renemba osang ka ministry-isa metetdaktsüogo.a