Rio nung medal angutsüji tasak asütsü: Mary Kom

New Delhi, August 19 (Agencies): Ponguben tashi world champion M.C. Mary Kom-i, taruba küm Rio de Janeiro nung ayonga aliba Olympic Games nung tatem tonga tua medal angutsüji kanga saksaker asütsü, ta Bodbar nü shia liasü.
2012 London Olympics nung flyweight (51kg) tarensen nungi bronze medal abenla Mary-i, Rio Games atema qualify asütsüji kanga tasak asütsü saka ano medal abentsü ang tera tasakba asütsü, ta osangbener dang ashi.
Ni tangbo Olympics atema qualify asütsü asoshi dang meranger, takok ngua medal angutsü atemabo khen lir ang jembidi. Ni tang ashitsü ajak agi, ni noklang nung noklang meranga tsüngteptsü merangtsü, ta lai ashi.
Arishi küm 32 tain, Mary ya tang Bengaluru nung lir aser la 2016 World Championships atema renemshitsü asoshi UK-i aotsü akok.
“Tang tangbo ni World Championship nung ang rangloka lir. India nungbo ita ka shiang training agitsü aser iba sülen ni teti training agiba linük UK-i aotsü akok,” ta Mary-i ashi.
Ni tesüiba mapangtem nung aiben tilala yirua liasü saka ni tangbo anogo shia tashi taitba kümdar, ta laisa shisem.