Rio Olympic atema asaya tesem ka yanglutsü contractor tasen nem nungloktsü

Rio de Janeiro, May 31 (Agencies) : Rio Olympic tenzükdang bicycle aser motorcycle arishitepba tesem (velodrome) meyangluzük alitsü ta arendaka bilemba ajanga ketdangsertemi tang inyaka aliba company anendaktsür company tasen ka nem iba mapa nungloktsüogo, ta osangbenertemi metetdaktsü.
2013 küm sen million dollar 38 alang contract agizükba Construction company,  Tecnosolo ket nungi iba contract May ita tetenzüklen agienogo, ta Rio yimti ketdangsertemi ashiba Folha de S.Paulo osangkaket ajanga Hombarnü metetdaktsü ta Xinhua news agencies osang ajanga sangdong.
Tecnosolo company ket nungi contract ageinba dang masü saka parnoki mapang nung atonga atonga tamakok aludaktsüba atema senjia sen dollar 119,000 achi. Taküm amshitsü aliba iba asaya tesem (velodrome) ya yaküm renemtsü sentong liasü.
Iba mapa kara tembangtsü atema Rio sorkari Engetecnica company nem sen million dollar 15 tali agütsüsemogo, ta kasa osang ajanga ashi.
Engetecnica company-i iba tesem August 5, 2016 nü Olympic asayamong metenzük dangsa renemer alitsü atema mapang arishia inyakdar.
Taküm march ita nung Engetecnica aser Tecnosolo compangy na lokteper inyaktsü nungloka yutsü aser iba mapang Tecnosolo-i sen dak tsükdakba ajanga parnok kijai iba mapa metemteter ta ashi.
Tan ya zünga taküm kümsa Rio sorkari iba dak sentakba contract ponguben buba ageinerba lir.
Lemzüktsüba mapang tashi nung mapa metemtetba ajanga Januaruy ita nunga Rio sorkari tennis asayaba tesem aser kor nung mener asemtepba tesemtem yanglutsü indang contract agein.
Taküm Olympic Games asayamong August 5 nungi 21 tashi amongtsü aser Paralympics September ita 7 nungi 18 tashi amongtsü sentong lir.