Rio Olympics: Abhinav-i India wako abentsü

New Delhi, June 10 (Agencies): Taküm August ita 5 nü nungi tenzüka Brazil kübok Rio de Janeiro yimti nung asayatsü ayongba 2016 Rio Olympics asayamong lapokba sentong nung India telok tenüng nung linük wako abentsü asoshi prangpong toktepa kashishir, Abhinav Bindra shimba osang ka Indian Olympic Association (IOA)-i tanü, Hokolbar nü metetdaktsüogo.
2008 Beijing Olympic gold medallist, Abhinav-i tan agi Olympic asayamong nung 5 ben buba asoshi shilem agir akümtsü.
Beijing nung 10-meter rifle gold agizüksang, arishi küm 33 tain Abhinav ya tanü tashi nung individual tetoktepba nung India asoshi gold medal agizüktsür asayar kija lir.
World Championships, World Cups, Asian Games aser Commonwealth Games densema, international tetoktepba balala nung medal jenti ngua alisang, Abhinav ya Rio Olympics nung shilem agir India telok indang goodwill ambassador-a tawa shima liasü.
Ano külen, Rio Olympics nung shilem agiba sülenbo pai asayatsüren toktsütsü lemtetba osang ka Abhinav-ia tanü metetdaktsüogo.