Rio Olympics: IBF-i Kom atema wildcard jenjang bushitsütsü akok

New Delhi, June 01 (Agencies): Olympics nung India tenüng nung boxing tetoktepba nung shilem agitsüren ketdang asür, Indian Boxing Federation (IBF)-i India’er tongti tetsür tsüngteper, MC Mary Kom asoshi wildcard jenjang bushitsütsü asoshi sentong renemba osang ka angazükogo.
Brazil kübok Rio de Janeiro nung taküm August ita 5 nü nungi tenzüka asayatsü ayongba Olympics kübok boxing tetoktepba nung shilem agitsü temeten agütsütsü asoshi IBF-i Kom atema wildcard jenjang bushitsütsü sentong renemer lir.
London nung 2012 küm ayongba Olympics Games boxing tetoktepba nung bronze medal agizüka, arishi küm 33 tain Kom Olympics boxing medal agizüker mezüngbuba India’er tetsür tsüngteper aküm.
Ajisüaka, tesüsa agiba Rio Olympics nung shilem agitsü temeten agütsütsü asoshi ayongba world championships tetoktepba nung tamakok ngua, Kom-i tanü tashi Rio Olympics nung shilem agitsü temeten monguteti lir.
Taoba mapang world champion akümtsü jenjang 5 ben tashi ajangzükla, Kom-i boxing sabang nung tongti shilem agiba nüngtem nung la nem wildcard jenjang agütsütsü onükji IBF-i Amateur International Boxing Association (AIBA) den benoktsü renema lir.
Asayar ajak atema ayonga agiba tetoktepba nung takok mangur asayar mesüra asaya telok ka nem asayamong nung shilem agitsü jenjang agütsüba dang Wildcard jenjang ajar.