Rio Olympics: India’er tebur hockey teloki Ireland den asayatsü

New Delhi, April 27 (Agencies): India’er tebur hockey teloki par Rio Olympics mezüngbuba asaya Ireland telok den asayatsü asoshi tanü, Bodbar nü lemzükogo.
Defending champions, Germany; European champions, Netherlands aser Pan-American Games champions, Argentina nunger densema, telok 6 densemba Pool B nung India teloka densemba osang jangjaogo.
India teloki par mezüngbuba asaya Ireland den taküm August ita 6 nü asayaba sülen maneni Germany den August ita 8 nü, Argentina den August 9 nü, Netherlands den August 11 nü aser Canada den August 12 nü asayatsü lemzüka lir.
Pool B nung densmba telok rong nungi temaba jenjang 4 anguba telok pezüi August ita 14 nü nungi tenzüka asayatsü renemba knock-out tetoktepba nung shilem agitsü.
Australia, Great Britain, Belgium, New Zealand, Spain aser Brazil teloktem Pool A nung densemba osang jangjaogo.
Ano külen, India’er tetsür teloka Argentina aser Australia na densemba telok nung densemba osang angazükogo.
Küm 36 shi nung tan mezüngsüa Olympics nung shilem agitsü jenjang angur, India tsürtemi par 1 buba asaya Japan tsürtem den taküm August ita 7 nü asayatsü lemzükogo.
Parnoki maneni Great Britain den August ita 8 nü, Australia den August ita 10 nü, USA den August ita 11 nü aser Argentina den August ita 13 nü asayatsü.