Rio Olympics: Saina-i 5 buba jenjang ajangzükogo

New Delhi, July 21 (Agencies): India’er tetsür badminton asayar mongin, Saina Nehwal-i taruba August ita 5 nü nungi tenzüka Brazil kübok Rio de Janeiro nung asayatsü ayongba Rio Olympics badminton tetoktepba tetsür singles tarensen nung 5 buba jenjang nung asayatsü ajangzükogo.
Saina sülen anidaka, külem sensotsür, P.V. Sindhu-ia 9 buba jenjang anguba osang jangjaogo.
Küm 4 tejaklen, London Olympics nung bronze medal agizükla, Saina tang World No. 5 lir aser Sindhu 10 buba jenjang nung lir.
Ano külen, tebur singles tarensen nung tang World No. 11 nung alisang, India nunger Kidambi Srikanth-ia 9 buba jenjang ajangzükba osang jangjaogo.
Badminton World Federation (BWF)-i tanü adoktsüba world rankings nung ajemdaker Rio Olympics nung badminton asayar jenjangji lemzüktsüogo aser tan jenjang lemzükba dak ajemdaker Olympics asayatsürena taruba Mongolbar nü lemzüktsütsü sentong lir.
Tebur aser tetsür singles tarensen nung Malaysia nunger Lee Chong Wei aser Spain tsür, Carolina Marin na temaba jenjang nung lir.
2016 BWF world superseries takok marok agizüksang, Lee sülen anidaka, taoba mapang World Champion 2 ben tashi akümsang, China nunger Lin Dan-i 2 buba jenjang nguogo.
Tetsür singles tarensen nunga Carolina sülen anidaka, China tsür, Wang Yihan aser Li Xuerui na 2 buba aser 3 buba jenjang nung lir.
Doubles asayar, Jwala Gutta o Ashwini Ponnappa na aser Manu Atthri o Sumeet Reddy nati India tenüng nung tetsür aser tebur doubles nung shilem agitsü renema lir.