Rio, T.R.Zeliang aser Shurhozelie

Tang Nagaland yimten nung tashi taittiba aser tongtibangtiba purtemji Lok sabha nung tatar Wb.Neipihiu Rio, Chief minister, T.R.Zeliang aser NPF tir Dr.Shurhozelie asütsü. 2003 küm nungi par asem külem ser inyakba ajanga Nagaland nung NPF teloki tang tang tashi yimsü asür. Atangji, par asem rongnunga yimten tangatetba kenyongi memelenshii ‘regional party’ nung an tepong noksa agir takok aser tamakok tia ajak nung shilem agia arusangjibo tambu Shurhozelie ya dang lir. Ajisüaka, Rio aser T.R.Zeliang nunger maden asübo Shurhozelie nunger kisüngibo Nagaland nung sorkar akümtsüsabo meinyaktetla. Ano, talisa NPF telok metenzükdang, NPC ta ser aliba mapangbo teimla tajung ka magütsütetba agi yimsüsür ajak Congress küma omaba otsü yashiang atalokba otsü asenoki meteta lir. Ajisüaka, tesüngmangtsüka Congress asütsü raktepba tiyalong nung NPF telokiang sorkar akümtsüsa takok angubaji tangari masü saka talisa Rio den ano K.Therieh nungertemi Congress sorkar nung parnok lenir S.C.Jamir toktsür NPC agi NPF kümer tashi tulu amshia toktepba ajanga anguba takok liasü. Iba takok manung tang tashi NPF wangshir aser Congress telokbo tang tashi mesakteti timtemdagi. Ajisüaka, Rio-i chief minister teinyakdak nung pasasa mulungtetter Lok sabha nung tatar inyaktsü aoba ajanga meimlai T.R.Zeliang chief minister kümogo. Atangji, T.R.Zeliang ya Rioi pa melentsü mulungsua shimtetba masü saka Rio den külem inyaker kilonsertem rongnung mapa agi pa-ang tetemsüba asütsüsa ajurushiba agi par medemertem teimbai mulunga pa shimtet. Rio-i Chief minister menden toktsür Lok sabha nung tatar inyaktsü aoba nükjidongji center nung kilonser inyaktsü tebilemba aliba agi liasü, saka aji matalok. Ibayongji, pai ano Nagaland nung toktsür aoba chief minister menden to menungraa ait südi, iba jagi NPF telok nung telemsa adoka  T.R.Zeliangi aniba telok kanga kangshidaktsüogo. Iba komoji tang tashi maneptet, tang mapang tatsüka tsüngda nung mezüng taoba NPF sorkar nung Home minister,Wb.Imkong L Imchen aser tanabuba nung Lok sabha nung tatar Rio NPF telok nungi khen atsüngina yuja lir. Ano, NPF telok nungibo meindok aser maridok asünungji parnok ajakji NPF talenba küboksa alitsü ta NPF tiri metetdakja lir. Ano, anogo ishika tsüngda tang teinyakdak MLA anasemka NPF telok nungi atsüngintsütsü amai reprangtetter. Joko, taoba küm ana tsüngda NPF telok nung T.R.Zeliang chief minister südaktsüner o mesüdaktsüner na tsüngda meputep adoka tamajung chitepba agi parnok tsüngda talangka pilaadokogo aser tang NPF telok nungi atsüngintsürji teti atema atsünginer asütsü. Iba tiaji tangatet dang asünungji, süra Rioi kechi inyaktsü ? kechi telok nung adentsü ? Election aru atatsü asü ? Mesüra tang yongi T.R.Zeliang mendenji anokshitsütsü ? ta asüba tasüngdangba aika agi nübortemi pei pei bilemba jembi tenzükogo. Atangji, ibaji Nagaland nung tanü onük lir. Aikati Rio agi lakogo aser ano aikati T.R.Zeliang-ibo tanaben chief minister mebentettsüla amato bilemer. Süra, tena melen shiba asütsü ? ta asüba telangzübaji asenokisa bushitsüla. Atangji, tang India yimten tia reprangdangra BJP tatulen aser Congress talulen lir, anungji aikati BJP telok nungang dennütsüa akok, ajisüaka BJP teloki Rio magizüktsüa akok, kechiyong pa dang pelaa alinungbo mezüngyongi pa center nung minister kümdaktsüla. Ano, külen bilemdangdi süra yimten nung kenü amaidangbo alitsü masüji tanü Congress ankhu majungyonga asüngbo ajungtsü ta bilema alitsü. Ajia shitak, saka tang Nagaland nung Congress tir Wb.K.Therie asünungji, ashiko Rio-ibo denüa alitsüa akok kechiyong Rio, Imkong L Imchen aser T.R.Zeliang dena parnok ajakji Congress nung yimsüsür südangba purtem lir, saka K.Therie o Rio nabo melamelabo meputeptettsü amai pilaa lir. Atangji, Nagaland nung Congress shia arutsübaji tang alir lenirtemi tangar kar aniok nung dang ashi parnok kijaibo makoktsü. Aji oda, Rio asoshi takoktsü lenmang aika rongnung kaji Therie melen pa Nagaland Congress nung lenir akümtsüa akok mesüra ano lenmang kaji pai anir ‘Regional Party’ tasen ka tenzüktsüa akok. Koba südir süang, tongpangji Rio külen aser Shurhozelie o T.R.Zeliang na külen ta asütsü.