Rio tazüngba degree dak aketba ken o angadangtsü

Kohima, July 6 (TYO): Taoba Nagaland Chief minister aser tang Lok sabha MP, Wb.Neiphiu Rio-i pa 2014 küm Lok Sabha election nung tokteptsü asoshi tenüng agütsüdang, pai pa tazüngba degree tiyazü agütsü ta aija okadak ken o agüja aliba angadangtsü asoshi Chief Judicial Magistrate Kohima-i July 8 nü mapang latetogo.
Bodbar nikongdang, Rio mapa anema ken o agütsür Wt.Rosemary Dzüvichü-i yangi de Oriental Grand hotel nung osangbenertem den jembidang, lai iba osang ya metetdaktsü. Taoba 2014 küm Lok sabha election nung Rioi pa tenüng dak aketba temetettsütem agütsüdang, pai pa Political Science nung BA Honours jenjang ngutet ama agütsü, ajisüaka ibaji tiyazü ta aija Human Rights Law Network tenüng nung Wt.Rosemary-i agüja lir.
Tazüngba kulikaket tiyazü amshiba atema sensaker aser tilartema aika temerenshi ngua lir, anungji parnok ama temaba jenjang nung alirtema temerenshi angutsüla ta laisa ashi.
Ajisüaka, ano Rio tazüngba jenjang dak aketba ken o okadak benoka aliba ya yimten ken o ka ama küma ogo, kechiyong kibalembua aliba tsütsülen nungi Rio  atema jembitsüsang okatsüri CJM Kohima nungi ochiobendang mangutsü amai bilemer, kechiyong obendangla (CJM) ji NPCC tir K.Therie tamo (sister in law) lir aser par jalaji Chief minister T.R.Zeliang’er jabaso den kibong küma lir, anungji iba ken o ya CJM Kohima nung masü saka tanga okadak belena bener oa jembitsüla ta ken o agüja lir.
Iba ken o ya yimten onük den kecha sendaktepa mali, saka ibai tazüngba jenjang dak aketba aser tanü loktiliba nung aibelenba ken o lir . Iba ama ken o nung kaketshirtem aser lokti nung tilartem merenshiba otsü lir, anungji parnok denji kasa yimten lenirtem daka inyaktsüla ta laisa metetdaktsü.
Laisa ashiba agi, Human Rights Law Network ajanga State Chief Election Commissioner nungi RTI ajanga temetettsütem kar asüngdanga inyakba ajanga metetba agi, Rio-i 2014 küm Lok sabha election nung pai tazüngba jenjang tai zülur affidavit agütsüogo ta nangzük aser iba kaketji melentsü atema Chief Election Officer dang asüngdang saka CEO-i pa dang iba kaketji   Election Commission of India ket nung lir ta ashiba otsü dena lir.
Human Rights Law Network, Nagaland ajanga yaküm 2015 küm November ita nungi tang tashi nung nübortem ajangzüktsü asoshi Gauhati High Court, Kohima Bench nung  ken o 20  (Public Interest Litigations) agüja aliba nungi July 5 nü ken o ti angadangogo.
Item ken o (PILs) ji District Hospital Dimapur, CHC Sanis Town Wokha, PHC Thonoknyu, Tuensang, PHC Sakraba, Thipuzu Phek, PHC Piphema, Pherima, Chumukedima, Sub Centre Kuisam, Kiphire; Sub-Centres Khuzama, Bayavü, Jotsoma,  Kohima aser ano Kohima kübok Sub Centre Meriema, Thizama aser Chiedema nung doctor maliba , inyaker agi meperiba,  aser kiojen shitak maliba mapatem anema agütsübatem lir ta laisa ashi.
Iba ken o agütsür ita pongo ajunger, ajisüaka tang tashi Health & Family Welfare Department nungi telangzüba kecha okadak agütsüba mali saka mapang apuloktsütsüba ken o dang bener arur, anungji joko H&FW department nung aibelena alir ketdangsertem okadaki jaoktsüla ta okadak ken o agüja alir tenüng nung jembir okatsür-ia metetdaktsüogo.
Ano, National Rural Health Mission (NHRM) Nagaland nung sen crore 62 mashi amshiba ken o (Special Leave Petition) Supreme Court nung agüja lir, aser iba ken o yabo center sorkar o CBI nati langzütsüla ta obendangertemi metetdaktsüogo. Iba ken o angadangtsü asoshi anogo dang yongyaa atar ta laisa metetdaktsü.
Ano, Nagaland nung yimten nung tetsürtem nem menden 33% agütsütsü lateta akaba ama mapa küma inyaktsü asoshi Supreme Court nungi obendang  agüja liaka, mapa küma meinyakba anema ano ken o agütsütsü renema lir Wt.Rosemary-isa metetdaktsü.